إيش أخذت مستلزمات جمالية معاي في شنطة السفر ؟!



يالله إنك تحييهم 
بوسات أحضان وشوق 
كيفكم من بعد غياب وأهوه رجعت كيف تحسوني تغيرت ؟ لا !! أوكي هههههه 
طبعاً أول شيء مثل منتم شايفين غيرت ستايل المدونة عشان تنفتح نفسكم شوي وكذا حركات *فيس خجول*
الله يبارك فيكم مقدماً 
وثاني شيء مثل ماشفتوا بالانستقرام نزلت صور لمعظم أيامي بالسفر
كانت رحلتي رحلة استجمام لشرق آسيا وتحديداً لإندونيسيا لمدة 18 يوم يعني تقريباً أسبوعين
رحلة جميلة تخللها بعض الصعاب وبإذن الله راح أكتب موضوع كامل يخص رحلتي وكيف كانت
لو حبيتوا يعني *فيس لابس نظارة طبية * وأنا هناك فكرت وقلت ليش ما أسوي فيديو عن مسلتزمات السفر الجمالية 
اللي معاي ممكن تستفيدوا منها وتجيب لكم أفكار، فأول يوم وصول لنا في جزيرة بالي الجميلة قررت وقلت أوكي
 بكرا باصحى بدري قبل يصحون أهلي وكذا أصوات أخواتي الصغار ماتطلع بالفيديو
وأصور الفيديو بأصوات الطبيعة اللي حولي شيء يفتح النفس والله وحطيت المنبه وصحيت لكم الساعة 5 فجراً
وصحيت وتفاجئت بأن الشمس أشرقت عندهم يعني احنا 5 تماماً بس تشوفون شعاع الشمس سبحان الله شيء مرة يونس
جمعت أغراضي وأعدت ترتيبها زي ماكانت وأخذتها وبدأت تصوير
فااا نشوف ايش الأغراض أو المستلزمات اللي أخذتها وباتكلم عنها ليش أخذتها وكيف كانت معاي خلال الرحلة
وهل ندمت إني أخذتها أو نسيت شيء أو أو ...
يلا نبدأ بسم الله وع بركة الله والحمدلله والله أكبر < ذبح أضحية مو موضوع :S




المناكير :
المناكير هذه أخذتها بنفسية يعني ماقلت لا احنا خريف ولازم أخذ ألوان خريفية عشان أواكب الفصل أو الموضة أو الخ أخذتها كذا عاجبتني وأبغى أتكشخ فيها بأيام العيد أصلاً ياحياتي عليهم ماعندهم فصول فصلهم واحد طول السنة ههههه يعني احنا أشوا منهم .

اخترت هذه الألوان :
 Come Along With Me - By H&M
 736-By Florelle
 327-By Clarity
Mad Lilac - By H&M

خلال السفر كله استخدمت فقط لونين خلال الثلاث الأيام الأولى للعيد أما باقي الأيام ماستخدمتها لأن حسيت بتعب كل يوم أمسحها ولا كل شوي أمسحها يعني احنا برا من الصباح لين الليل متعب جداً كل شوي أمسحها وأرجع أعيدها عشان الصلاة مافي وقت أبداً لكن هل استفدت منها طبعاً استفدت بس لو اكتفيت بلونين كان أفضل لأن أخواتي شالو معاهم مناكير كمان فحسيت إنا قشينا كثير مالها داعي كان ممكن كل وحده فينا تكتفي بلونين أو لون بشنطتها .
أيضاً مزيل المناكير تكلمت عنه بإحدى الفيديوهات تجي عبارة عن مناديل دائرية صغيرة وفيها مزيل سهله وبسرعة تشيل وماتاخذ مساحة وروعة ورخيصة .

بعد كذا بالفيديو أخذت معاي :
مناديل مبللة منظفة وموازنة يومية للوجة من جونسون 
تزيل حتى الماسكارا المقاومة للماء 
للبشرة الدهنية والمختلطة 

موجود بداخلها 24 منديل 

المناديل هذه استخدمها من قبل فترة ، أحبها كثير وفيها ميزة جميلة ، قبل جربت كل أنواع المناديل اللي تخص جونسون سواء للبشرة العادية أو الجافة أو الحساسة أو نوع مكتوب لكل أنواع البشرة وكلها طلعت لي حبوب ببشرتي لو نمت وأنا ماغسلت وجهي بعدها، بس إش كانت ميزتها إنها تشيل من جد الماسكرا المقاومة للماء وماتبقي أي أثر للماسكارا بعيونك ، عكس هذه تماماً المناديل هذه حبيتها من قلب لأنها ماتعدم البشرة وبالفعل تناسب البشرة المختلطة والدهنية وتنظف وجهك كويس ولو نمتي وماغسلتي وجهك بعدها ماتطلع لك حبوب ولا تدهن ببشرتك ، بس عيبها إن ماتشيل الماسكارا كويس يبقى أثر كبير وكأنك أصلاً مامسحتي عشان كذا بتلاحظوا إني أخذت مزيل مكياج للعين غير المناديل هذه ، يصير أول أمسح بالمنديل وجهي ورقبتي بعدين أمسح بالقطن ومزيل مكياج العيون لعيوني ، فكذا صرت تمام التمام .

بعد كذا بالفيديو وريتكم كيس القطن ، قبل السفر أخذته من السوبر ماركت كان عليه عرض حاجة زي كذا وقلت كويس مع إن أنا أحب قطن جونسون أنعم ع بشرتي بس حتى هذا كويس وأفضل حجماً يكفي الوجه والعين تمسحي فيهم .

بعد كذا الشنطة اللي كأنها مقلمية أخذتها من مهجة / جدة بعشرة ريال صراحة مو متأكدة لو لسه موجوده بس شفتها قريب مع وحدة من صحباتي وقالت لي اشترتها وقتها فأتوقع إنها لسه موجودة ، هي تستخدم لمستلزمات الحمام السائلة عشان تعلقيها كذا جنب المروش أو البانيو ويصير سهل عليك تستخدميها ،أو ممكن تستخدميها للمكياج ، أو ممكن لأي شيء إنتي تبغيه ماهي محكورة لشيء معين،  بس بما إن شنطتي جيوبها صغيرة فحطيت فيها أشياء بشكل عشوائي ،

 نبدأ ونشوف اش هي :

أول شيء مزيل رايحة العرق أو ديودورنت من نيفيا حجم صغير بخاخ أول ماخذته شفت شكله قلت كيوت وريحته أكيد كيوت دام مكتوب بريحة ورق التوت مدري توت ، مافتحته ولا جربته إلا وأنا بالسفر ، ريحته جداً قوية وأبداً ماشميت ريحة توت ، شميت ريحة عطر رجالي قوي ،والحمدلله ماستخدمته كثير لأن مايطلع فيني ريحة عرق كثير إلا لو كنت شايلة بموس لكن دام شلت بالشمع فما يطلع مني أبداً إلا نادراً نادراً نادراً يمكن مرة من بين 30 مرة شلت بالشمع أو بالآلة ، بس معظم الأحيان كنت أحطه احتياط عشان بعدين لا يطلع فيني شيء ماحد بيرجعني البيت عشان خاطر عيوني ههههه وخاطر أغسل جسمي فاا بس .

بعد كذا تونر الشاي من لاش ، بشرتي مختلطة ومع الحر تصير مختلطة مائلة للدهنية هذا بكف والكف الثاني حساسة 100% فهذا الشيء بيركفت تو ماي سكين يعني أفضل تونر جربته بحياتي ، اللي بشرتها حساسة لما تستخدم أي تونر تحس بلسعات وتصير حمراء وكذا ، هذا لا بارد ومنعش وأحبه ، مأقدر أستغني عنه ويعتبر مهم في روتيني اليومي ، بالذات قبل النوم .

أيضاً شلت معاي كمية تكفيني من المرطب اليومي في علبة صغيرة بلاستيكية ، هذه العلب متوفرة بكل محلات أبو ريالين أو محلات التجميل ، تشمل علب بخاخ وعلب عصاره ومثل هذه علب صغيرة للكريمات كلها بكيس تجي أخذتها كيسين الواحد بريالين بس ، فحلو ويوفر لك مساحة بالشنطة ، فحطيت كمية تكفيني وكفتني وبزيادة للاستخدام اليومي .

بعد كذا مزيل مكياج العيون من نيفيا زي ماقلت بقي منه شوي وقلت أخذه نخلصه أنا وأخواتي وأرميه .

أعواد الإذن ، ممنوع بنات تستخدموها لداخل الإذن ممنوع والله صار لي موقف بحياتي تعلمت منه بسبب هذه الأعواد ، هي تستخدم فقط لتنظيف الأذن من برا وأنا أستخدمها للمكياج وبالأخص للآي لاينر ، وهي أصلاً صممت زمان لتنظيف أنوف الأطفال الكيوتين بعدين بدأو الناس يستخدموها للأذن وهذا شيء غلط ممكن يسبب لكم مشاكل زي ماسبب لي مشكلة *فيس بدمعة* اللي ع بالي يعتبر نظافة ومدري كيف قطعت إذني فيه وهو شيء غلط .

وكمان أخذت مزيل مكياج الوجه من بايوديرما المخصص للبشرة الدهنية يجيك لونه أخضر طبعاً ماناسب بشرتي نهائيا لأنها حساسة فاحس بلسعات بعدها ، بس أخذته لأن مابقي غير هذه الكمية والمناديل خفت ماتكفيني أنا وأخواتي فقلت ممكن نتخلص منه ونستخدمه بس للأسف ماستخدمناه وبيرجع زي ماهو ههههه  .

كذا خلصنا الشنطة الأولى ، نجي للشنطة الثانية أيضاً أخذتها قبل فترة من مهجة وسعرها حول العشرة ريال أو 12 ريال مدري نسيت عجبني قماشها فيه اسفنج يعني لو فرضاً حطيتي فيها مكياج مع الدق والشيل للشنطة اللي بتحطيها فيها مايتكسر اللي بداخلها ، فاشيء جميل يعني عجبتني ، المهم بما إن شكلها مكعب أو مصندق هههه وعندي شنطة للمكياج وحده ثانيه فخليت هذه للأغراض السائلة اللي حجمها كبير شوي ، نشوف ونبدأ :

أول شيء أخذتهم هم :
غسول الوجه الخاص فيني من جونسون وتكلمت عنه بفيديو روتيني اليومي الصباحي ،
 أحبه كثير ومناسب لبشرتي < شكلها تقرب للأطفال *فيس متحسس إنه لسه ماكبر*
أيضاً فرشاتي ومعجوني يعني عند كل العالم فرشاة ومعجون هههههه .

بعد كذا الكيس الثاني : 
أول شيء من ورا علبة بلاستيك حطيت فيها شوي من زيت المكاديميا للشعر عشان السباحة والكلور بإذن الله راح أتكلم عنهم قريب بشكل مفصل .
وأخذت كمان زيت جوز الهند عشان الكلور والسباحة وحطيتهم بعلبة بس أخذت كمية كبيرة لي ولأخواتي بالذات الصغار لأنه يسبحون أكثر .
أخذت أيضاً المقشر من ستيفز لكل أنواع البشرة بالمشمش اللي ماستغني عنه ولاجربت أحسن منه ويمكن يطلع في أحسن منه بس أنا لسه ماجربت ههههههه ، أحبه وبقي منه شوي وأخذته ع أساس أخلصه هناك ، أيضاً أخذت مرطب سائل خفيف للنهار من جونسون جربته أسبوع وحبيته أخذته احتياط بحال لو خلص المرطب حقي وحسيت إنه جاء بالشنطة ضيف ورجع ضيف ماستخدمته أبداً ، أيضاً البلسم اللي ريحته تجنن لازم يكون بالشنطة .

بعد كذا الكيس الثالث:
شامبو هيربل اسننز أنا مأحب هذه الشركة أحسها مليانة عطر أكثر من الشامبو بس أخذتها لغرض معين ومهم بالنسبة لي راح أتكلم عنه بعدين ، وكمان حامي الشعر من الحرارة من لوريال ع أساس وقت العيد لو باستشور شعري أو أملسه بس للأسف من كثر التعب ماكان فيني أسوي شعري ، مثل ماقلت لكم شعري طويل وكثيف يحتاج وقت مني وأنا بطيئة وأحب أضبطه مية مية فياخذ مني وقت ، بس استفدت منه بعد ماستحم أبخ بخات خفيفة وأمشط عشان يحمي شعري لو حتى من أشعة الشمس تدخل من تحت الطرحة .

ونجي للكيس الرابع :
غسول معقم للجسم من ديتول بريحة البرتقال ! ليش أخذته دام أخذت غسول للجسم من كريم 21 ، لأن وقت السفر سبحان الله تجلسي بلبس واحد طول اليوم وتروحي أماكن كثيرة وجسمك يحتك بأشياء كثيرة ممكن تنجرحي وإنتي ماتدري أو ماتحسي ممكن تلمسي شيء فيه بكتيريا أو جراثيم معدية أو أي سبب يخص النظافة والأمراض الله يكفينا  ، وبيني وبينكم محد يظمن شيء فهذا الشيء مهم جداً لدرجة أخذت لأبوي علبة خاصه فيه وأمي خاصة فيها وأخواتي كل ثتنين بعلبة ، فكنت أستخدمه بالترويش أول بعدين أغسل جسمي بجل غسول الجسم من كريم 21  ريحته اممممم ماأقدر أوصفها بس ريحة حلوة ومكتوب ع العلبة بداخله مستخلص الكشمير ومايجفف البشرة وهذا المطلوب لو رحتي بلد حار وجاف شوي ,

أخر كيس معانا :
كريم الجسم بزبدة الكاكو أو بالكاكاو من فازلين ، سلكوا لي بالجملة السابقة ، عندي مشكلة مع شيلان الأسعار والله مدري ليش ههههههه ، زي مانعرف زبدة الكاكاو ترطيبها ثقيل وتناسب وقت الشتاء بس بما إنا رايحين خلال الرحلة لمنطقة باردة وجبلية فأخذته ضروري ومهم عشان ماتتشقق بشرتك من الجفاف والنشوفية القبيحة ، بالمقابل له بما إنا رايحين لجزيرة بالي الحارة وأيضاً مدن ثانية حارة أخذت موسترايزنق سن لوشن من نيفيا بنسبة حماية من الشمس 30%  وكنت أستخدمه ع الأماكن المكشوفة من جسمي مثل رجلي ويداتي إذا طلعنا وخلال أيام جزيرة بالي والسباحة كنت أستخدمه ع طول بعد السباحة عشان مانحرق من الشمس ، ومعظم الأيام كنت أنسى أحطه وللأسف الشديد جسمي تبقع * فيس بيجهش بالبكاء * .

آخر شيء قطرات العين من ريفرش عبارة عن قطرات مرطبة أبوي يستخدمها من زمان وجربتها مرة وحبيتها ، بالذات مع العدسات اليومية للعين ، فاشيء ماقدر استغني عنه مع العدسات .

وبس كذا خلصنا الحمدلله عن إيش أخذت معاي من مستلزمات جمالية وقت السفر !
هل ندمت على شيء أخذته وماستخدمته امممممم ماأحس إني ندمت ع شيء لأن وقت السفر وبالذات سفرات الاستجمام إنتي رايحة تتونسي مو رايحة تقضي من السوق ، معظم الناس تفضل تستخدم الأغراض اللي يوفرونها الفنادق ، بس للأسف أنا ما أحب بالذات شامبوهات الشعر والجسم تسبب لي تشدق من الجفاف ، غير أصلاً معظم الفنادق ماتوفر لك حتى فرشاة ومعجون أقلها يعني !
فيعني هذه الأغراض مهمة بالنسبة لي وماحسيت إني ندمت أخذت شيء حتى لو ماستخدمته عشان ضميري يرتاح زي اللي ماسك الكتاب طول اليوم ومايذاكر هههههه أهم شي يطمن نفسه ماسك الكتاب < محد يتكلم عن نفسه *فيس يشرب عصير ومروق*

هل في أشياء ندمت إني ماأخذتها لا مافي شيء الحمدلله كل شيء حسيته مضبوط وكامل لأن قبل السفر بأسبوع أحب أبدأ تجهيز مو قبلها بيوم أو بيومها وأكتب كل شيء بورقة وأقسمها كذا كذا كذا ، وأشوف في شيء ناقص احتاج اجيب حجم صغير أو اش ممكن أسوي وقبل السفر بيوم أدخل الأغراض وأرتبها وزي كذا .

من قلبي أتمنى تكونوا استفدتوا مرة أحب الكتابة تصدقون ! أحسها تعبر عن اللي بالقلب أكثر من الفيديو !
بس الفيديو جميل يعبر عن اللي بالقلب بصورة حركية فما أقدر أستغني عنهم الإثنين ههههههه

أشوفكم بفيديو وبوست ثاني لو عندكم أسئلة أو نقاط ماتكلمت عنهم اكتبوا لي تحت :)
مرة أحبكم ياجميلات العالم كله <3
حضن بوسة XO