مشترياتي من الأوت ليت في إندونيسيا ♥



هلأ هلأ والله ♥ 
جالسة أكتب التدوينة وأنا أسمع أناشيد زمان لأفلام كرتون سبيس تون *روميو صديقي علمنا معنى الوفاء علمنا أن لا نخشى الآلام * كلمات جميلة ♥ ♥ 

اليوم راح أوريكم مشترياتي من الأوت ليت في إندونيسيا ♥ 
طبعاً الكل يعرف اش هي ستايلات شرق آسيا بشكل عام تكون كيوت وأغلبها فيها رسومات وياناسو 
*عشان كذا مشغلة أغاني زمان ههه*
فالبداية حابة أقول بشكل مختصر إيش هو الأوت ليت ؟ للي ماتعرفه هو عبارة عن سوق أو محلات تباع فيها الأشياء من الماركات العالمية أو المحلية بس بسعر أرخص ليش ؟ إما تكون راحت موضتها أو فيها خطأ مصنعي أو أي عيب يعني فيبيعونها بسعر أرخص من السعر الأصلي للبضاعة ، هذا الشيء موجود في كل بلدان العالم أتوقع وسمعت والله أعلم تتواجد عندنا بس بمحلات مدري وين هههههه ، لا بجد دايماً أسأل فين نلاقيها مرة قالولي بحي الشاطيء لما رحت لقيتها تقليد ماركات مو الماركات الأصلية ، فمدري صراحة فين ممكن نقدر نلاقيها هنا ، اللي تعرف لا تبخل علينا بمعلومات عنهم لكل منطقة في بلدها وشكراً مقدماً .

زي ماذكرت لكم أول ، خلال رحلتي لإندونيسيا الجميلة ماكان في أشياء كثير عجبتني كثر ماليزيا ، ماليزيا الملابس كانت أخ ياربي سواء ستوكات أو من الأوت ليت أو ملابس مقلدة بجد بجد ماليزيا كانت شيء وااااو للتسوق بس كان فيني كمية غباء قلت لنفسي لا يارنا أنا جاية أتمشى ما أبغى أتسوق إن شاء الله سفرتنا الجاية ، ولما جات جات سفرتنا الثانية لإندونيسيا توقعت نفس الشيء بماليزيا بس للأسف ، الله يغنيهم من فضله يارب يعني دولة فقيرة جداً عكس ماليزيا فكانت عكس المتوقع جداً من ناحية التسوق ، وجداً تحطمت مع إن جلست تقريباً شهرين مدري ثلاث شهور أجمع لي فلوس تكون خاصة فقط بالتسوق ورجعت ماصرفت منها إلا قليل ههههه ، أوكي نرجع لموضوعنا الأساسي الأوت ليت بإندونيسيا اللي رحته والحمدلله يارب إني توفقت فيه هو الأوت ليتات الموجودة في مدينة *باندنوق* طبعاً قبل أسافر سألت عنهم بمنتديات والأغلب جاوبني بإنها أفضل من الأوت ليتات اللي بجاكرتا العاصمة ، والحمدلله مافوتها علي ، رحتها وكانت بالنسبة لي أول مرة أدخل محلات أوت ليت وأنصدمت إن إحنا ماعندنا زيهم وهذا هم دولة فقيرة الله يغنيهم من فضله ، بجد والله قلبي إنجرح .

أغلب الإستايلات كانت كيوت ، المقاسات كانت تناسب أحجامنا أنا وأخواتي وأمي كلنا بوتيت فكانت جداً مناسبة الحمدلله ماتعبنا بالمقاسات لأن أغلب الشعب هناك بوتيت مو زينا يعني ، أنا وأختي روان نحب الأشياء الكيوت مرررة ، أختي رنيم الأنيقة ماكان في أشياء كثير تعجبها لأنها مو كثير تميل للأشياء الكيوت ، أختي رهف اللي بالمتوسط ستايلها يميل للكاجول والأشياء السبورت ففي أشياء عجبتها وفي أشياء لا ، فإنتي وذوقك ممكن تلاقي وممكن لا يعني .

الأسعار رخيصة جداً يعني تلاقي بلوزة كانت بمية وسبعين ريال مثلاً صارت بخمسين ريال ، الماركات الأغلب اللي شفتها متواجدة هي 21 فورايفر ونيو لوك وزارا ومانقو وماركات شكلها كورية أو صينية أو يابانية غالية وصارت تنباع برخص .

رحنا الأوت ليت بمدينة باندونق بليلة العيد *عيد الأضحى* الأجواء كانت خرافية وقت التسوق ، الناس كذا زحمة ومن بعد المغرب كل المساجد مشغلة تكبيرات الإحرام ، ومعلقين الزينات كذا حول المحلات أصلاً المحلات كانت ديكوراتها فضيعة كذا مجموعة محلات مفتوحة بشارع وبالنص مطاعم وحول كل محل ديكورات كذا أحواض سمك غريبة تجنن نزلت فيديو قصير بالانستقرام عن هذه اللحظات آخ ياربي .

وقت ماجينا للقياس يابنات والله الذي لا إله إلا هو إيش عليهم احترام ياربي ياربي تغنيهم من فضلك ، تخيلوا يابنات هم تقريباً يقفلون ع الساعة 8 الليل ووقتها كانت الساعة 8 إلا ربع وجالسين ينادون بأن الكل يسرع عشان بيقفلون ، المهم أنا وأختي واقفين بالطابور عشان نبغى نقيس بسرعة قبل نحاسب مكان القياس يفتح النفس أوكي مالها شغل الجمله بس بغيت أقول ههههه ، المهم تجي العاملة طالعت فينا أنا وأختي قالت تعالو وسحبتنا من بينهم كلهم ودخلتنا قالت Arab Araaab كلهم اللي كانوا قدامنا وورانا قالوا أوووه أوكي أوكي ومبتسمين لنا ماعصبوا ومازعلوا ، أنا وأختي قلنا أما عاد سمحوا لنا أما عاد جلسنا مصدومين وربي *فن تعامل ياهوووو* تخرفنا بسرعة هههههه لاحد يلومنا عندنا جفاف عاطفي بالتعامل مع الناس *قلب مكسور* ، بعدين بسرعة قسنا وكذا وخرجنا إلا ثنتين يستنونا برا عن القياس قالوا خالوا خلصتوا قلنا إيوا كذا تمام وسحبونا أنا ورنيم وروان وناديت أمي وجمعت أغراضنا وقدامنا صف طويييل بالمحاسبة قامت قالت للمحاسبة نفس الكلام Arab Araaab طلت فينا المحاسبة قالت أووه أوكي أوكي وجلسوا يبتسمون لنا وخلونا ننتظر المهم طفوا الأنوار وراحوا الناس وسحبونا قالوا تعالوا وجمعوا ملابسنا وحاسبونا وجلسوا يضحكون معانا ويعيدون علينا وكل وحدة تقول أنا في سوي حج كذا بكل فخر وفرحانين ، وإحنا أوكي أوكي الحمدلله ههههههههه ، بعدين أعطونا هدايا قالوا يلا اختاروا مرطبات شفايف بمناسبة العيد وعاد كل وحدة فينا أخذت حبة ومشينا وودعونا ، بغيت أكلهم يازينهم بس .

 إن شاء الله راح أتكلم لكم عن تعامل الشعب بصفة عامة بتدوينة فلوق إندونيسيا ، المهم نرجع لموضوع الملابس مثل مانتم شافين الملابس اللي أخترتها كانت جميلة علي بس للأسف بعد ماغسلتها شمرت علي ، أخذتها وقتها ع أساس الله حلو مقاسها وكانت XS بس بعدين لما غسلتها صغرت شوي أحسها ، بس تظل حلوة أيضاً الاستايلات وقتها أخذتها ع أساس لو جاء الشتاء ووقتها سفرتنا كانت بأكتوبر وكنت أقضي ع أساس ديسمبر لو جاء الشتاء اللي هو إحنا فيه حالياً ، أكثر قطعة حبيتها من كلللل قلبي اللي هي أول قطعة فيها صورة نمر *فيس يسوي نفسه نمر* أوكي سامجه ههههه ، المهم مرة حبيتها القطعة أتوقع أخذتها بسعر شوي مرتفع حول 100 ريال ، يعني بالنسبة لأسعار الأوت ليت كانت غالية ، مدري إش هي الماركة صراحة بس مرة حبيتها كثير كثير بما إني أحب النمور كثير ، ستايلها يجي وسيع وشوي قصير يعني لو رفعت يدي بطني يصير واضح ، المهم حبيتها أكثر شيء والباقي أيضاً جميل وحبيته ، مرة أنصحكم لو سافرتوا لأي بلد تروحوا للأوت ليت لو حبيتوا تاخذوا قطع مخفضة والأحلى لو شفتي أشياء كذا لازم تكون عندك وخامتها حلوة وتاخذيها برخص ، زي البناطيل اللي لونها أسود الباديهات الليقنزات الأشياء الأساسية يعني  ♥

فكانت هذه تجربتي الأولى مع الأوت ليتات الجميلة ، أتمنى تكون التدوينة خفيفة وظريفة واستفدتوا منها .
 أي أسئلة أنا حاضرة لكم  .


إش هو أفضل أوت ليت زرتيه بإندونيسيا ؟
هل قد زرتي أوت ليت موجود بالسعودية أو جدة يعني ههههه ؟ 
إيش أكثر ستايل تميلي له الكيوت ولا الكاجول ولا الأنيق الرسمي ولا الكلاسيك ؟

9 comments

  1. مرره رحت لبزار كانت فيه تيشيرتات برشيكا بس بعد ما شفتها في السوق بفترة وكانت بـ ١٥ و ٢٠ ريال .. طبعا ما ادري البزارات النساائية كذا او لا انا رحت لواحد مفتووح .. ومرره برضو شريت تي شيرت مرره كييوت بس مقصوص التااق تبعه من بزار بـ ١٥ ريال وللحين عندي .. هالشي زمان ما ادري اذا نظامهم للحين كذا او لا .. وبس

    ReplyDelete
    Replies
    1. يقولوا زمان كان في أِياء كثير زي كذا بس ذحين ماعاد تعرفي نصب كثير :(
      نورتيني <3

      Delete
  2. ماشاءالله الله يهنيكم ويسعدكم
    بس ياليتك لو صورتي لنا مناظر العسد وملابس مامتك واخواتك حسيت الكلام ككككثير وحمسني بس الصور مررره قليله
    وبالنسبه للملابس اللي بتسالي عنها موجوده في تاج توج والقوافي مرات مشيوله منها التاق ومرات لا
    ملابس كثييير اشتريها منهم كدا
    بس ترا اغلبها للبيت بناطيل اتش اند ام وفساتينه وكمان لقنزات مانقو وتبشرتات نيولوكوزي كدا
    وفي للاطفال ملياااان زارا بيبي واوكايدي وتاب الويا وكذا

    ReplyDelete
    Replies
    1. والله صادقة ليتني صورت إن شاء الله المرات الجايه انتبه لهذه النقطة
      يختي ما أظن هي نفسها اللي بتاج توج لأنها مقلدة ومقاستها مختلفة وخياطتها شوي مخربطة
      يعني صراحة مدري والله
      نورتيني <3

      Delete
  3. إن شاء الله باذن الله مسافرة اندونسياا ومشكوررة جدنن يابعدي

    ReplyDelete
  4. انا عكسك حبيتهم كلهم ما عدا التيشرت الاول ��

    ReplyDelete
  5. ايش اسم الاوت ليت اللي رحتي له ؟

    ReplyDelete
  6. مررة تجنن مشترياتاك ماشاءالله .. بس معليش ما قلتي ايش اسم الأوت لت اللي رحتيه ؟

    ReplyDelete
  7. في بالرياض مجمع كبير إسمه الرياض اوت لت وفاتح فيه محلات كثيرة معروفة .. مابعد زرته صدق بس اني قريت عنه وشفت صورة و وحدة من صاحباتي راحت له بداية الافتتاح اعجبها مرة بس مابعد فتحت كل المحلات .. كان في مجموعة محلات ملابس اطفال بس واخذت منها لبنتها وشفناها مرة حلوه والله .. توقعت انها من نفس المحل مو اوت لت. وفي ايضاً اوت لت مانجو في رويال مول الرياض. وأذكر في محلات اوت لت في العزيزية مول الرياض حلو والله مرة وكلها محلات معروفة شريت تيشيرتات عادية حلوة لجمعات بسيطة مع الاهل او طوارئ ماتتجازو اسعارها ال30 ريال.

    ReplyDelete

♥رأيك يسعدني ♥ fell free and comment♥