ج1: بداية التغيير وونوينا النية لزيادة الوزن بشكل صحي ♥

أهلين بنات 
كيفكم
تدوينة اليوم راح أتكلم فيها عن شيء مره ودي فيه من زمان وأبغى أحققه قريب إن شاء الله
وهو زيادة وزني للمعدل الطبيعي والصحي المناسب لجسمي !
أول مانولدت أنولدت بجسم طبيعي جداً و ع كلام أمي تقول كنتي منفوخه ومربربه وكل شيء فيك طبيعي وجميل لين دخلتي أولى ابتدائي يعني لسن سبعة سنين وقلبتي وتغيرتي وشهيتك للأكل صايرة عدم وبالغصب وبالضرب تاكلين وتتقرفين من كل شيء وتشمين روائح غريبة في الأكل وتذوقين كمان أشياء غريبة هههههه والله حالتي حالة المهم تقول من يومتها بدأ جسمك يضعف وكل ماكبرتي يضعف أكثر وأكثر لين وصلتي سن تقريباً 14 سنة وهي كان مرحلة المتوسطة ، أول مابلغت جاء في راسي إن غالباً البنت أول ماتبلغ يتغير جسمها للأحلى وتبرز لها أشياء بجسمها وتسمن وشهيتها تتغير وكل الكلام المعروف ، وبهذا المرحلة جلست أنتظر هذا الشيء يحصل وللأسف ماتغير فيني شيء وظليت نفس ما أنا وزيادة للأسوأ ، وقتها صار كلام الناس كثير يأثر فيني لأن كنت بمرحلة مراهقة وهذه المرحلة من أخطر المراحل بحياة الإنسان يعني ممكن وقتها يسوي أشياء غلط ممكن بس عشان يتفادى أشياء تضايقه بحياته من الناس وكلامهم ونظراتهم وهذه المرحلة بالذات البنت تكون حساسة أكثر من اللازم من كل شيء بحياتها !! ، فكنت أستخدم أشياء من ورى أهلي بس عشان ما أبغى صحباتي بالمدرسة يضايقوني بالكلام عشان جسمي اللي كان مره نحيف وتحت المعدل الطبيعي لجسم البنت في هذا السن ، أفتكر وقتها أستخدمت حاجه اسمها العنبرية صراحة مدري من إيش مصنوعة ولكن كان طعمها لذيذ ولا سوت فيني شيء ولا تغير فيني شيء لأن ماكنت ومازلت على حالة إني ما أكل أصلاً !! بعدها وصلت لمرحلة الثانوية ودخلت على عالم مختلف تماماً عن عالم المتوسطة ومشاعري وقتها كانت أكثر حساسية لأن كان في كثير بنات يضايقوني بالكلام والتعليقات والألقاب السخيفة وكنت ألاحظ وأقارن وهذا شيء مره غلط جسمي بأجسامهم يعني كنت من بينهم زي الكتكوته وماشاء الله كانوا جنبي عمالقة أجسام وطول هههههه فهذا الشيء أثر فيني وخلاني للمرة الثانية أخذ وأستخدم شيء من ورا أهلي عشان مايخاصموني وهي كانت حبوب البرياكتين فاتحة للشهية أخذتها أول سنة من الثانوي تقريباً لمدة 6 شهور ، مع الاستخدام المستمر الحمدلله وزني تعدل شوي وأفتكر وقتها زدت 6 كيلو وتغيرت شوي وحسيت بثقة بنفسي أكثر ، بعدها بفترة حسبت إن خلاص جسمي بيجلس كذا ع طول وتركت الحبوب ورجعت حليمة لعادتها القديمة ، رجعت نقصت وزني ولكن مو كثير بس رجعت نحفت ومن بعدها مازدت أبداً لين تخرجت من الثانوية ، لما تخرجت من الثانوية وكنت أداوم أول سنة بالجامعة كانوا صحباتي الجدد اللي تعرفت ينصحوني استخدم أيضاً حبوب لفتح الشهية اسمها سابروفيتا وقالوا لي إنها ماتنوجد بالسعودية ولازم أطلبها من مندوبة وبالفعل دورت لين لقيت وحدة وجابتها لي ، أخذت لي 4 علب أو 6 ناسبة والله ، واستخدمتها شهر واحد بس وزدت خمس كيلو لين وصلت 39 كيلو جرام ، طبعاً مو بس كانت صدمة لي كان شيء يونس كثير فرحت وانبسطت وكل مشاعير الحياة الحلوة ، كانت نيتي إني أكمل كل العلب ولكن ماخلصت بشهر غير علبتين والسبب كان إنها أثرت فيني كثير بعقلي ونومي أنا صراحة ماكنت أعرف ليش ماتنوجد بالسعودية ولكن أكيد لسبب ما ! فوقتها إذا متخيلين أجلس يوم كامل نايمه !! ماعندي مشكلة يعني بس أقوم أكل وأرجع أنام أي شيء غير هذا الشيء ماقدر أسويه أفتكر مره رحنا لجدتي وكان عندها ضيوف وقسم بالله بنات ماحسيت بنفسي إلا نايمة بينهم هههههههههه مره موقف محرج ولكن أقولكم قد إيش كان مفعولها بالتخدير وغالباً كل حبوب فاتحة للشهية تملك نفس الشيء من هذه الناحية ، فغير إنها كانت تنيمني بشكل غير معقول كان يجيني صداع مو طبيعي بجد بنات مو طبيعي ومعصبه وجيعانه وأبغى أتضارب مع كل الناس فهذا كان تأثيرها علي بشهر من الناحية السلبية بس طبعاً سلبيتها تفوقت على إيجابيتها وتركتها ورميت العلب الباقية ، وزني الحمدلله مانزل كثير من بعد ماتركتها يعني غالباً في ناس ترجع تنزل زي أول أو أكثر بس الحمدلله ماصار فيني كذا لكن نزلت كيلوا واحد وصرت 38 كيلوا جرام ، من بعدها صرت حساسة كثير من ناحية جسمي وخلاص صار جل اهتمامي كيف أسمن وأغير جسمي ، يعني يجيوني بنات يقولوا لا تغيريه خليك زي مانتي والله بعد الحمل يتغير ومدري كيف ويجوني بنات يقولوا انسي موضوع جسمك ماراح تتغيري واللي تجي تتشمت ليش نحيفة واه ولا يدك مره صغيرة كأنها يد بيبي ولا وجهك مره صغير كأنك طفلة ومن هالكلام المحبط صراحة !

بعد أول سنة من الجامعة توظفت وتعرفت على وحده الله يسعدها وين ماراحت وهي صديقتي الجميلة والحبوبة واللي أحبها ومن أكثر الناس اللي أرتاح لهم كانت معاي بوظيفتي يعني كانت زميلة بالعمل ، وألحين هي من أقرب الناس لي ، فتحت عيوني على أشياء وغيرت مفاهيم بحياتي وصدق والله ماقالوا : الصاحب ساحب ، سحبتني لعالمها و أثرت فيني كثير ، علمتني كيف أحب الأكل بدون فاتح شهية ولا حبوب ولا أي خرابيط ، علمتني كيف إن يارنا لما تاكلين ويبقى أكل احترمي النعمة وكمليه ولا من الأصل ليش هذه الكمية تسويها كلها ! علمتني إن يارنا لازم تسوي رياضة حتى لو جسمك نحيف ، علمتني كل يوم بالدوام أجيب فطور متكامل وصحي معاي ، علمتني أشياء كثيرة غيرت مفهومي تماماً عن الأكل يعني لو أقولكم قد إيش كنت أكرهه شيء اسمه أكل الله يكرم نعمة ربي ، كنت ما أبغى أشم ريحة أكل أتقرف من أكلات كثيرة وماحب أخلط أكلات مع بعض وما أكل إلا أشياء معينة وأخاف أجرب أكلات وكان عندي عقدة قوية مع الأكل ، أما الرياضة كنت زي أغلب الناس ألحين مقتنعة بإنها تنحف وإن المفروض ما أتحرك وأقعد جالسة عشان أسمن ، فكذا كان تفكيري وهي غيرتني تماماً من بعد فضل الله علي ، الحمدلله خلال سنتين من معاشرتي لها وممارسة التمارين والأكل الصحي زدت 2 كيلوا وثبتت على 40 هههههه ، طبعاً أنا ماكنت زيها إنسانة ملتزمة كنت شهر ألتزم وعشرة لا هههههه بس الأهم من كل هذا إني تأثرت فيها وأثرت فيني وتفكيري تغير100% !

ألحين مضى على هذا الكلام سنتين من وقت ماتركت الوظيفة ولحد ألحين ماتغيرت فقط لما أشتركت بالنادي قبل فترة أتوقع قبل سنة لو مو غلطانة زدت بشهر كيلو واحد ورجعت نزلته لأني ماهتميت وماواصلت الأكل الصحي ولا الرياضة !

ألحين عمري 24 سنة ولكن اللي يشوفني يقول أكيد 14 سنة ههههه والسبب هو جسمي الصغنطوط ، بس الحمدلله ولو إن جسمي نحيف وصغير إلا أنني أملك صحة الحمدلله يعني حتى معدل الدهون بجسمي ممتاز جداً بس اللحم ضعيف طبعاً فيعني إيش أقولكم ماشاء الله تبارك الله آخر مرة قبل ستة شهور سويت تحاليل عشان توصف لي الدكتورة فيتامينات ، كل شيء بجسمي مية مية لدرجة الدكتورة والله العظيم مصدومة فيني تقول معدل الدم في جسمك أكثر من المطلوب ومن كثر صدمتها قالت أوقفي لي وفسخي عبايتك فسخت لها عبايتي بسم الله علي قالت حرام عليك جسمك يجنن لاتسمنين خليك زي كذا روحي أمريكا وروحي شواطئهم كلهم نفس جسمك ولا تبغين زي هذا اللحم وتطلع لي فخذها ههههههههه يازينها !! المهم طبعاً كلامها أيضاً ماغير فكرتي وحلمي بأني أسمن وأتغير يعني معليش أنا بالسعودية يادكتورة ماني بشواطيء كاليفورنيا *فيس ماد لسانه* هههههه لا أمزح أمزح ، بس لا بجد أبغى أتغير أبغى وزني يصير مثالي وأبغى الملابس تصير على مقاسي ، أبغى مقاس رجلي يتغير شوي وأصير أقلها ألبس 37 ياخي هههههه ! وأبغى أصير أقدر أشيل صحن بدون ماحسه ثقيل ، وبالذات البزران ذحين أتفشل لو جيت أتحبب على نونو ويكون ثقيل والله أطيح أنا وإياه إذا جيت أشيله وكذا عاد أنحرج ههههههه والأهم أصير أكثر ثقة من ناحية هذه النقطة :) .

اللي حصل وبيحصل إني صممت 100 % لو مو بالطيب بالغصب يعني ناويتها نيه أكيده ماتخلص سنة 2014 إلا وأقلها وصلت للوزن الطبيعي المناسب لطولي وإن شاء الله يصير بشكل صحي ما أبغى أسمن دهون أبغى أسمن لحم وأبغى جسم وتقاسيم وشدة وحركات وعلوم زينه و..الخ .

من هنا لكل بنت تعاني نفس ما أعاني أنا هنا معاك وأحس فيك وأعرف بمعاناتك وراح أمسك بيدك معاي إن شاء الله ، أنا عشان أتحمس معاكم وأغصب نفسي بالإلتزام سويت لي حساب بالانستقرام خاص بهذا الشيء فقط 
راح تلاقوني هناك باسم : ragainweight@
كل بنت حابة تشارك تشوف هذا الموضوع لوحدة أيضاً كانت زينا سابقاً وكانت تعاني وصارت إنسانة بيرفكت بحياتها وجسمها وتفكيرها ماشاء الله تلاقوها بتويتر وعندها كمان مدونة : - #سمنة_صحية -
سووا حسابات بالانستقرام ولا تويتر وخلونا نحمس بعض ونشارك بعض تجاربنا وكلنا نوقف مع بعض :) ♥ .

بإذن الله أخلص اختباراتي النهائية خلال شهر وأرجع أسوي لكم سلسلة خاصة بهذا الشيء وتجربتي كاملة إن شاء الله تعالى !
في كثير ناس ماتحب تذكر زي التفاصيل اللي فوق ذكرتها لكم لأسباب كثير منها :
إن أحب أوريكم إني بيرفكت وماعندي أي عيوب !
وزي مايقولوا لما تقولي لأحد نقطة ضعفك يستخدمها ضدك لو كان مثلاً كارهك ولا عدو لك !

ولكن الكمال لله وحده وكل إنسان إلا مايعاني من شيء مو لازم يكون شكله لو حتى شخصيته ولا روحه ولا أي شيء فكثير حلو لو تكلم عن هذا الشيء وهو مرتاح بأن في ناس راح توقف معاه وتدعمه وتشجعه وماتنتقص هذه النقطة ضده ع قولتهم يمسكه باليد اللي توجعه ! الله يكفينا ويكفيكم شرهم !

شكراً كثير لكل وحدة قرأت التدوينة كاملة وأخذت من وقتها وسمعتني
وأتمنى منكم إنو تتمنوا لي الحظ هههه وتدعون لي كثير
واللي حابة تشاركني خلينا نقول تحدي أو تحقيق الهدف راح أكون كثير مبسوطة
 


21 comments

  1. حلو انو يكون الانسان طبيعي جداً ومايدعي المثاليه بالنسبه لي ما اميل للناس اللي تدعي المثاليه وانها بيرفكت ومافيها عيوب مهما كانت ناجحه وشاطره محد يجذبك قد الانسان العفوي لأنو بالنهايه معليش احنا بشر ! ومين من البشر كامل ؟ حبيت جملة الكمال لله وحده انا ماعرفك شخصياً صادفت مدونتك
    وشفت فيك بنت موهوبه وحابه تفيد البنات من حولها واستفدت من مدونتك مثل ماغيري كثير استفادوا
    جميل انك شاركتني قصتك وتجربتك وبإذن الله تشاركينا كمان نجاحك في تحقيق هدفك وصولك للوزن اللي تبينه بإذن الله مع انو ايش فيها البتيت والله نعومه ولزيزه ومهما كبرت تبان صغيره بالعمر بس بمجتمعنا للأسف الناس ماعندها الا التحطيم لو انتي مليانه طلعوا فيك مية عيب وحطموك ولو انتي نحيفه نفس الشي
    عموماً اخر كلامي نصيحتي لك ماتاخذي وصفات اي احد ولا تاخذي بنصيحة فلانه وعلانه في الفيتامينات وهالامور اسألي احد مختص عشان صحتك واعتمدي مع النظام اللي راح تعملينه على الرياضه عشان يكون عندك جسم بيرفكت مشدود ورياضي
    واخر شي الثقه الثقه الثقه اهم شي بالحياه يارنا لو شكلك كيف مكان لا تسمحي لأحد يقولك ربع كلمه وخلي ثقتك بنفسك اعلى من العاليه مافي انسان بهالحياه راح ينفعك فَ لا تخلين احد يجرحك بنص كلمه او يحسسك انو انتي فيك شي
    وان شاء الله زي ماقلت لك اخر السنه تبشرينا بالوزن المثالي وبدعيلك من قلبي قد ما استفدت من مدونتك ودام انتي جالسه تفيدين بنات كثير راح تلقين ان شاء الله ناس كثير تدعيلك بالخير وان ربي ينولك مرادك ان شاء الله .. موفقه

    ReplyDelete
    Replies
    1. يا أهلين وسهلين نورتيني والله <3
      بإذن الله أشارككم كل نجاحاتي بالحياة :)
      شكراً حبيبتي على نصائحك من بعد تعرفت على صديقتي مستحيل بعدها أفكر أستخدم أي أدوية غير إني أكل تدريجياً هذا الحل الوحيد لمشكلتي ، والثقة موجودة بس راح تكون أقوى وأكثر مع وصولي للهدف إن شاء الله <3
      منورتني حبيبتي وشكراً لدعواتك وكثير أحب الناس يكونوا حولي اللي زيك وبنفس تفكيرك وشخصيتك
      بوسات وحضن كبير <3

      Delete
  2. حبيبتي رنووش قرأت كل حرف وصراحة انا اول الداعمين لك وكمان جربت نفس اللي شوفتيه وسمعتيه من الناس من كثرة ما كلامهم اثر فيني بقيت افضل قعدت البيت كثيير واتصفح التويتر اعمل ريفرش كل ثانيه في الانستغرام ويوم مااخرج اروح الجامعه وارجع ع طول حاسه نفسي عجوزه عندي 50 سنه مع انه عندي 21 مش حابه اطول عليكي بس ربنا يوفقك ويسعدك ♥♥

    ReplyDelete
    Replies
    1. هلا هلا هلا بمنّه <3
      نورتيني بكل حته <3
      هههههههههههه والله تجينا هذه الحاله معضم الأحيان بس فكري فيها بصدق يعني انتي بعز شبابك وبسن اللي المفروض يكون من أجمل سنين العمر لاتضيعينه عند تويتر وجلسة البيت والخنقة <3 منورتني والله
      بوسات وحضن <3

      Delete
  3. انا كنت نفسج و كنت استخدم سوبروفيتا ومتنت شوي بس مو اللي ببالي كنت ابي بعد امتن والحين بعد الولاده وصلت للجسم اللي ابيه بس ولهت عالعصاله فقاعده اسوي رياضه عشان ارد نفس اول :( بس هدفي من الرياضه اهوا اللياقه بالمقام الاول موفقه .
    في وايد فيدوات حلوه للرياضه في يوتيوب اللي ماشيه عليه 4 miles fast walk with leslie sansone عجيييبه

    ReplyDelete
    Replies
    1. طيب بعد الولادة وصلتي للوزن اللي بغيتيه بصحة ولالا ؟
      يعني جسمك مشدود ولا مترهل يعني زدتي دهون ولا لحم ؟!
      هذا ليش لما أحد يقولي بتتغيرين بعد الولادة ودي أعطيه بوقس
      غالباً كل الحريم إذا سمنت وقت الولادة تكون سمنة مؤقته ياتنتفخ موية ولا دهون عشان انفتحت شهيتها مع الحمل وزي كذا عاد إلا من رحم ربي :( فتلاقين جسمها مو متناسق ومقسم وحالته حاله :(
      فانتبهي على نفسك ياحلوتي هل زدتي عن قبل بصحة وإن شا ءالله أشوف اللي اعطيتني الفيديو :)
      وأتمنى لك من كل قلبي توصلي لحلمك وهدفك اللي تبغيه <3
      منورتني ولبى اللهجة اللي أعشقها <3
      حضن وبوسات كثيييرة <3

      Delete
  4. صحيح وزن الحمل والولاده مؤقت بيروح بالتدريج يعني ايش ذنب النحيفه تعيش اسعد ايام حياتها وايام زواجها وهي مو واثقه من جسمها وملابس النوم يبغالها جسم يعبيها عشان تقول اجلس نحيفه بامتن مع الحمل�� لان مافيها حيل تهتم بنفسها بعد ما تولد وترجع جسمها زي اول..الله يوفقك يارب ويعينك ودائما طريق الالف ميل يبدأ بخطوه ودام الشغله في راسك راح توصلييييين لها باذن الله وكلنا معاكي ♡♡

    ReplyDelete
  5. يوووووووه يابنت مركبه كاميرا بحياتي ..هههههههههههه مممره كنك تتكلمين عنننني .... ولا والله الولاده ماتأثر عندي بنت وولد ولله الحمد بس شوفيني ننننننننننفسك ووورب الكعبه ...

    ReplyDelete
  6. رناااااا :""" .. يا ربي الحمد لله لقيت أحد زيي..! أناا 37، صح جسمي شكله حلو، وبعمل رياضة من زمان باستمرار، فشكلي مرتب من فضل ربي، بس ع قولك إنك ما تلاقي مقاسك، خاصة لو إنت زيي عظمتك صغيرة!..

    واحد من الأسباب اللي كانت ما تخليني آكل إني ما أجوع أصلا، ولو أكلت أكل عصافير واشبع، غير إن عندي مشاكل في الهضم، جالسة أعالج هالمشكلة، حبوب الخميرة فادتني كثير، بس لازم تشربي وراها شي دافي، والحمد لله صرت انسانة طبيعية وأجوع ع وقت الوجبات... فيه ناس تضحك ما تصدق إنه نعمة إنك تحسي بالجوع! .. والحمد لله حاسة فيه تغيير للأفضل، بطيء، بس إن شا الله ثابت ^^

    متحمسة معاك جدًا، شفت ع انستقرام كم حاجة بجربها معك.. ربنا ينولنا بصحة وعافية... موفقة في اختباراتك يا رب

    ReplyDelete
  7. �������� وفي احد مثلي �� نفسج وربي لدرجه بديت أشك اني الوحيدة لان حتى الضعاف في عايلتي ما يوصلون ضعفي �� بس بإذن الله رح أبدا أكل مثل العالم والناس مو آكل بطاط وحلويات وعقب أقول ليش ما أمتن يالله حبيبتي موفقه وبدعيلج من كل قلبي وإن شاء الله الكل يوصل للوزن الي يبيه بصحه وعافية ������

    ReplyDelete
  8. Hi Rana, I'm (thisisanotherme) on Instagram :D
    كلامك كله قريته حرف حرف رنا من جد حسيت فيك T_T
    أحس فترة المراهقة أكثر شي أثر فيك :/ يعني وقتها صدق الكلام يأثر مو بس في نفسيتك الا يخليك شوي شوي تفقدين الثقة بنفسك وهالشي يأثر فيك لوقت طويل :(
    سالفة الحبوب مرعبة مرة احس *_* الحمدلله ماقد تجرأت أجربها، صح جربت الحلبة والعسل وما اعرف ايش بس الحبوب وكذا ماتجرأت، الحمدلله إني ماجربتها!
    الناس اللي ترمي الكلام يدك صغيرة وشكلك نتفة وكولي عشان تسمنين هذي نفسي تنقرض :) يارب يسمنون يصيرون دبب عشان يعرفون يقولون كلام ماله داعي للناس :) مشكلة مجتمعنا يعامل النحيف كأنه شخص ماله شخصية ولاهيبة عشان جسمه صغير! وأنواع التعليقات والمسخرة! يعني الواحد مايتجرأ يقول للسمين لاتاكل عشان تنحف والا ليه ماتسوي ريجيم بس النحيف عادي من يشوفونه مالهم سالفة الا يالله كل وابلع والا يالنتفة وانواع الحكي اللي يقهر +_+

    يالله مرة حبيت صاحبتك اللي دلتك على التمارين، الله يوفقها وين ماكانت...
    مرة فرحت لمن وصلت لهذا البارت، الله يديم عليك الصحة والعافية ويرزقك الوزن الطبيعي والجسم اللي تتمنينه يارب ♥

    أحب صاحبة حساب Challengeweight هي اللي ساعدتني أوصل للي أنا فيه الحين، الله يسعدها ويوفقها والله كل يوم ادعي لها ♥

    شكرا لك على مشاركتك تجربتك، جدا جدا استمتعت بالقراءة، الله يعافيك..
    بدعي لك دائما ♥
    وأنا مشاركة ب #سمنة_صحية من أول ♥_♥

    ReplyDelete
  9. ي قلبي ي رنو تصدقي حاسة فيك كثيييييير انا جدا متأأزمة من وزني يعني مثلا لمن أوقف عند المراية اقول جسمي حلو ومايحتاج اسمن ولمن قست وزني طلع 36 هنا انصدمت .. و اللي حولي جدا معقديني ويقولو اني نحيفة مره .. والا يقولو لأمي انتو تأكلو منها .. وفوق هذا قصيرة وخذي لك التريقة اللي تجيني وخصوصا اني الكبيرة .. وهذه النقطة عقدتي برضو ..
    .. اما حساب سمنة صحية عرفته تقريبا في شوال .. وطبقت اللي فيه وكانت نفسيتي وقتها عال العال وثقتي بيرفكت.. بس للاسف تكاسلت ..

    ربي يقويك ويكون معاك .. وبإذن الله توصلي للي تبغاه وتطمحي له

    ReplyDelete
  10. وانا اقرا كلامك حسيتك تتكلمين عني.. تقريبا انا اعاني من نفس المشكله. بس الي يختلف اني ايام الدراسه كان وزني الحمدالله.. لكن لما بديت الجامعه هنا وزني بدا يتلخبط.. اتوقع بالنسبة لي يعتمد عالنفسيه، لما كنت ماشيه تمام بدراستي كنت تمام، بس لما كنت انشغل كثير واتوهق بشغل الجامعه كنت انحف. اول ماخلصت الجامعه وجلست بالبيت وشلت هم الوظيفه هنا بديت انحف من جة + غيرت اسلوبي في الاكل وصرت اكل صحي واسوي رياضه وهالشي زاد وخلاني انحف اكثر..
    انا بنفس عمرك ووزني ٤١.. الرياضه تركتها بس مااقدر اغير نظام اكلي وارجع اكل وجبات خرابيط ومطاعم لان اصلا اجسامنا ماتستفيد شي.. وصحيح انا احيانا نفسيتي تقفل من شكل جسمي لكن اعرفي حاجه وحده، دام الصحه تمام الحمدالله ف هذا الي يهم وخلاص.
    بالنسبه لي اي وزني تحت المعدل الطبيعي، بس اذا اكلي صحي، وصحتي عال العال ومااشتكي من اي امراض ف هذا الي يهمني والحمدالله.. احتاج بس ازيد عدد الوجبات باليوم + اتوظف واشتغل لان التفكير الكثير ينحف بعد ومو ناقصه.

    راح اعمل فولو في الانستقرام وللمدونة وان شاءالله منكم نستفيد :)

    ReplyDelete
  11. انا اختي الصغيرة نفس مشكلتك احاول دائما معاها لاجل ان تاكل خاصة الفاكهة هي لا تحبها ةلا تاكل اي شيء مشكورة على عرضك لتجربتك يلا راح تفيدنا اكيد

    ReplyDelete

♥رأيك يسعدني ♥ fell free and comment♥