عرض : فرشاة الوجه من ريل تكنيك ❤



Real Techniques Expert Face Brush
فرشاة الوجه من ريل تكنيك 

باتكلم لكم اليوم عن تجربتي مع فرشاة الوجه من ريل تكنيك
أخذتها من آمازون قبل تقريباً أربعة شهور تلاقونها - هنا
بسعر : $8.98 يعني تقريباً 35 ريال






  قررت أجرب فرشاة وحده منهم عشان أشوف لو عجبتني راح أشتري منهم أكثر ولو ماعجبتني يكون الحمدلله ماخسرت فلوسي ، فجلست أبحث عنهم كثير لين قررت وبكل تركيز أجرب هذه الفرشاة بالذات عشان شكلها المميز أولاً وثانياً ماعندي نفس شكل أو قصة شعيراتها ، وبأول سطرين أقولكم ليتني اشتريت البقية :( ، * تي جااااااااااااااااااااانين * من جد تجنن ، مره حبيتها وصرت أستخدمها لخطوات كثيرة ، هي تستخدم للوجه بشكل عام أغلب الناس يستخدموها لمد كريم الأساس ، وأنا منهم ! ، بس بعدين صرت أشوفها بيرفكت ومثالية جداً جداً للكونتور ، أنا عندي فرشاة اشتريتها من سيجما مخصوصاً خصيصاً للكونتور بس لها تكنيك معين ودمج ومش عارفه إيش ، هذه حسيتها لما أستخدمها للكونتور يعني تِكنتر وتدمج بنفس الوقت يعني ماتسوي أول شيء خط بعدين تضطرين تسوين بعدها دمج للخط اللي سويته عشان مايبين شيء قاسي هارش كذا ، عشان وجهي صغير ومافي مساحة مره كبيرة بخدي فمعضم الأحيان يطلع كونتور مره كبير علي وكأني سويت فيها كل خدي بس بعض الأحيان استخدمها كذا بخفة من الجنب ويصير بيرفكت ، بس لما أسويها على أمي يطلع الكونتور يجنن ويجنن خطوتين صارت بخطوة بسبب هذه الفرشاة !!

حجمها صغيرعشان كذا قلت لكم للكونتور تنفع وعشان رسمة وقصة الفرش اللي مره ناعمة وحلوة كمان تساعد في الكونتور أو تحديد الوجه لو بغيتوها عربي ، قاعدتها حلوة يمديك توقفينها ع تسريحتك بدون ماتطيح ، وعادي مدخلتها بالكاسة اللي فيها فرشي وماسبب لي أي ازعاج ، يمكن لو أخذت كل المجموعة تصير قاعداتها تسوي زحمة مع فرشي الباقية ، استخدامي لها مع كريم الأساس ممتاز ويدمج لك إياه بشكل مره ناعم وبيرفكت نفس تأثير فرشاة سيجما F80 ، نفس الشيء مايختلفون كثير !

باختصار وما أطول البوست وأقرقر كثير ، حبيتها وأنصحكم فيها وأحسها ماست هاف لكل بنت ! ، والنصيحة الأهم لا تشترونها غير من أمازون أو من نفس الموقع أو من موقع درق ستور ، لأن يبيعونها بسعر مخفض وبسعرها الأصلي أو قريب منها ، أما تروحون تشترونها بمية ريال وعليها ، زي قبل فترة طلعت أو تواجدات بوحدة من الصيدليات قرابة الميتين ريال إوعكم حرام !!! خذوا بسعرها هذه مجموعة فرش من سيجما ولا فرشتين من ماك !!

إن شاء الله تكون التدوينة خفيفة ولزيزة وكيوطه عليكم

قولوا لي أحسن فرشاة جربتوها من ريل تكنيك ؟
ومن فين اشتريتها ؟



تنسيق للعيد برعاية متجر Choies ♥


تنسيق للعيد

مرحبا بنات
اليوم تدوينتنا برعاية متجر أو موقع Choies 
 قبل فترة كتبت عن تجربتي للشراء من موقعهم تلاقون التدوينة - هنا -
طلبوا مني أيضاً أختار من عندهم 3 قطع وأنسقها ومره أنبسطت لأن كان نفسي وكنت ناوية أنا وبنت عمتي نطلب منهم نفس اللي راح أوريكم إياه بعد شوي ونلبسها للعيد *ياااي*



طبعاً من فترة أنا وهي كان نفسنا مرررره في ستايل معين ظهر وكان دارج ومازال دارج وجلسنا نبحث نبحث عن موقع يبيع القطعة اللي نبغاها وسبحان الله صادف إني شفتها بنفس الموقع بسعر مره حلو ، قلنا خلاص إن شاء الله نطلب منهم وكذا ، بعد فترة سبحان الله كلموني الموقع وطلبوا مني اختار من عندهم كم قطعة وانبسسسسطت كثيييير وقلت يلا يابنت اختاري نفس القطعة اللي نفسك فيها ، اللي هي هذه *ترررررا* :


تلاقونها - هنا -

أخذتها بسعر 26 $ دولار بس ذحين عليها تخفيض لاتفوتكم 16 $ دولار
يعني من 100 ريال إلى 60 ريال 
خامتها عجبتني وانصدمت منها صراحة مره مره حلوة وثقيلة وفخمه جداً .

وهذه بعض التنسيقات والاستايلات عليها :







 
♥♥♥♥♥♥♥♥♥♥♥♥♥♥♥

بعد كذا حاولت أنسق عليها أي قطعة علوية عشان يناسب الستايل وجلست أدور أدور لين لقيت هذا الشيء وكان مره مناسب وأكثر شيء مناسب وعجبني كثيررررر وهو كروب توب عليه ورد وبلون أسود وأبيض الاستايل اللي متخيلته وأبغاه  :


تلاقونها - هنا -

أخذتها بسعر 23 $ دولار يعني تقريباً 90 ريال

وهذه بعض التنسيقات والاستايلات عليها :





♥♥♥♥♥♥♥♥♥♥♥♥♥♥♥

وأيضاً أخذت شيء وقتها عشان الربيع والصيف ربطة للشعر مره أحبها وعندي منها مليييييان وأحب ألبسها لما أسوي شعري ويفي كذا يصير ناااعم شكلي وكيوت :$ :


 تلاقونها - هنا -
أخذتها بسعر 10 $ دولار تقريباً بسعر 40 ريال 

وهذه بعض التنسيقات والاستايلات عليها :







طبعاً الطلبية طلبتها قبل شهرين ووصلتني من بعد ماطلبتها بشهر لأنه كان توصيل مباشر من الصين أتوقع إلى السعودية فأخذ وقت على بال مايوصل يعني مايحتاج يكون عندك إذا طلبتي غير بريد سعودي عادي .
عشان كذا قلت أقولكم لو حبيتوا تطلبوا من ألحين للعيد ولو حبيتوا تطلبوا وتجيكم بسرعة تدفعي زيادة أتوقع 15$ توصيل سريع وتجيك خلال أسبوع إلى 4 أيام .

♥♥♥♥♥♥♥♥♥♥♥♥♥♥♥

آخر شيء وعارفة الكل بيسألني من فين اللي هو الشوز اللي منسقته عليه :


اشتريته قبل فترة من خطوات وكان عليه تخفيض أخذته بخمسين ريال ، الكعب يجنن لأنه عريض ويساعدني بالمشيء بس الله وكيلكم مقاسها 36 فأمشي وتخرج من ورا وأنا أعصب صرت أحط مناديل جوا عشان تضغط ع رجلي وماتطلع :( .

أتمنى تكونوا استفدتوا من هذا البوست وساعدتكم ع تنسيق للعيد 
أشوفكم بتدوينة الليلة أو بكرا ع حسب فضاوتي إن شاء الله 

تجربتي مع تشيكوكا الصابون الأسود المغربي من متجر AnaChic



Chaacoca Moroccan Black Soap

تشيكوكا الصابون الأسود المغربي

برعاية متجر AnaChic


مرحبا 

آسفة مرة تأخرت بتدوينة أمس ووعدتكم أخليها تدوينتين بس ماقدرت ، جلست أنظف غرفتي من وإلى وبعدين غسلت ملابسي ونشفتها وكويتها ياساتر أخذت مني نص يوم وحطيتها نووومه ، جهاااد والله ههههه 

المهم نوخوش بالموزوع 

* حابه أنوه تنويه مهم وهو إن المتجر باسم أنا شيك ، وهو لا يمت لي بأي صله فقط تشابه أسماء ، يعني المتجر مو لي * 

صاحبة المتجر الكيوت أرسلت لي الصابون المغربي وطلبت مني أجربه ولو حبيته أكتب عنه ، مرت فترة طويلة من لما أرسلته لي وبما إن أنا قليلة الخبرة في الحمامات المغربية خفت إني أعطي انطباعي عن المنتج بعد تجربتين من نفس المنتج هذا فعشان كذا طولت كثير بكتابة التجربة لحتى أشوف شيء واضح أكتب عنه .

باتكلم عن نظرتي أنا بغض النظر عن ما لو كانت صحيحة ولا لا 

ولكن من خلال تجربتي للمساج في إندونيسيا وماليزيا وبعد كذا لما زرت تركيا بس كان وقت شتاء فما جربت *مقهورة* خلال جولتي فيها لاحظت انتشار الحمامات التركية بكثررررة في الشوارع وأيضاً في إندونيسيا خصوصاً جزيرة بالي كانت منتشرة الحمامات الإندونيسية ع الطراز الهندوسي ، كلها هذه كانت على مبدأ الاسترخاء والتغذية والنظافة والانتعاش ، يعني ماكانوا كاتبين تفتيح بشرة ولا كانوا يتكلمون تصليح عيوب ولا يعني كانوا مركزين على هذه النقاط . 

من هذا الجانب أنا متأكدة إن الحمام المغربي نفس النظام والفكرة ، يعني فكرته هي الاسترخاء وتنظيف الجلد من الأوساخ والجلد الميت والإحساس بالانتعاش وتغذية البشرة ، ماهي فكرته إنك فجاءة وبحول من الله تتحولين من سمراء خمريه زيتونيه إلى بيضاء زي لون اللمبه والثوب الأبيض السعودي ههههههه، يعني مثلاً لونك زي هالي بيري الجميلة اللي ماكأنها بتطق الخمسين قريب *فيس يبكي ويصيح* وتبغين يصير لونك زي نيكول كيدمان الجذابة ، مره انسي انسي إنك تحصلين هذه الفكرة ، إلا في حالات التدخلات الجراحية باستخدامهم مكونات أتوقع اسمها القلوتاثمين أو ليزر تفتيح أو كريمات فيها نسبة عالية من الهيدروكينون أو كريمات أو إبر توحيد لون البشرة للمصابين بالبرص اللي يكفينا وإياكم زي ماستخدمها مايكل جاكسون وسامي سوسا .

فلو إنتي تبحثين بين سطوري عن كلمة تبييض قفلي التدوينة أحسن هههههه * سوري :( *

أنا إنسانة لوني خمري زيتوني أحب لوني كثير وماعندي أي طموح ولا أفكر ولا أجري ورا أي شيء يخليني لمبه تسطع ، حتى لو لاحظتوا إني أستخدم كريمات تفتيح يب يب أستخدمها للتفتيح وليس للتبييض في فرق !! بمفهموي ونظرتي التفتيح يعني نضارة في البشرة البقع والتصبغات اللي تتركها الحبوب تختفي وتوحيد لون الجسم بالكامل يعني يكون قطعة وحدة مافي تباين بالألوان ، هذا اللي أبغاه وأجري وراه وأحلم فيه، وما أبغى أغير لوني أبداً عشان لما أحد يشوفني يقول أومق أومق برازيلية سيكسي *متت ضحك* ، دمي خفيف مو ؟ خلاص طيب سويت مقدمة طويلة عريضة بس عشان ما أبغاكم تتخاذلون من التدوينة ولا إنطباعي .


بسم الله الرحمن الرحيم والصلاة والسلام على أشرف الأنبياء و المرسلين سيدنا محمد صلى الله عليه وسلم أما بعد يشرفني أن ، أمزح أمزح خلاص والله آخر مره هههههههه

زي مو مكتوب على العلبة :

( Chaacoca Moroccan Black Soap is an amazing moisturizing cleanser that exfoliates and cleanses the entire body leaving skin smooth and silky. This 100% natural detoxifying soap is rich in vitamin E and organic argan oil. It improves circulation, revitalizes skin, and fights aging.)

الترجمة : ( تشيكوكا الصابون الأسود المغربي منظف ومرطب رائع يقشر وينظف بشرة الجسم ويتركها ناعمة وحريرية ، الصابون طبيعي 100% في إزالة السموم من البشرة ، غني بفيتامين E وزيت الأروقان الطبيعي ، يحسن الدورة الدموية وينشط ويحارب شيخوخة البشرة . )

 

 المكونات :

صابون مكون من زيت الزيتون وزيت الأورقان .

بلد المنشأ :

المغرب

يناسب جميع أنواع البشرة .

وظيفته : 

ينظف ، يقشر ، ينشط البشرة .

 


هذه صورته من الداخل قوامه يشبه قوام الفازلين الهلامي مو جامد مرة ولا سائل مرة ، ريحته حلوة بمعنى يعني أحسها حاليه ، وريحته تماماً زي ريحة الصوابين المغربية المعتادة مع تكة ريحة زيت زيتون .

 

طريقة الاستخدام :

تفتحين مسام بشرتك وتطرين جلدك بطريقة حمام السونا لو حبيتي أو تشغلي موية حاره لين يطلع بخار وتجلسي فيها << تبذير ، وهنا أفضّل طريقة حمام السونا اللي تشتريه ، أو ممكن تسوي طريقة تجيبي موية حارة بقدر صغير و دافور وتحطيه بالحمام وتقفلي عليه وتخليه لين يتعبى الحمام بخار وتجلسي حوالي خمس دقايق لين تفتح مسام جلدك وبشرتك ، وبعدها كملي الطريقة ، إذا بتسألوني عني أنا كيف أسوي امممم عشاني أحب الاسترخاء كثير فما أبغى أتعب نفسي وأجيب دافور ولا حمام ساوانا ومدري ايش يبغاله وقت كثير وأنا لو الشيء ياخذ مني وقت أتكاسل أسويه كل أسبوع ، فطريقتي إني أغسل جسمي بمويه دافيه وأقفل باب المروش حقي * المروش حقي يشبه الدولاب كذا * وأشغل المويه الحاره وأجلس شوي بعدين أقفلها لين يتعبى المروش بخار وبعدين أخذ مقدار إصبع من الصابون وأمسده على جسمي وأتركه لمدة 15 دقيقة ، بعدين أشطف جسمي كامل بموية دافيه ، بعد كذا أخذ القلفز اللي بالصورة الأولى من ذا بودي شوب وأبدأ أقشر رجلي من تحت لفوق بعدين أشطف جسمي كامل ، وخلاص :) .

 * ملاحظة : مو شرط تكون طريقتي هي التكنيك الصحيح لطريقة الحمام المغربي الصحيحة بس أنا مرتاحة معاها ونتيجتها مرضيه بالنسبة لي وسهلة علي *

 

بتسألوني ايش هي طيب الطريقة الصحيحة :

باقولكم حسب ما قرأت ويفضل تسوينها بمكان خاص يعني تروحين لهم كذا يكون عندهم جميع التجهيزات للحمام المغربي عكس لما تسويه في البيت وحوسه وأغراض ، ويكون حمام شامل لجسمك وشعرك ووجهك ، تدخلي بحمام أو غرفة البخار بعدين يغطون جسمك بالصابون المغربي وتجلسي بالبخار مدة ربع ساعة - 15 دقيقة - بعد ماتنفتح المسام يبدأ مفعول الصابون المغربي على بشرتك لدقايق معدودة بعد كذا يشطفون جسمك بالموية ، بعد كذا يستخدمون الليفة الخاصة فيهم دايماً نشوفها مع الصابونات المغربية مو زي حقتي اللي ذكرتها فوق ، وبعد كذا تستخدم تكنيك معين للتقشير وإزالة الجلد الميت ، بعد ماتخلص توزع قناع خاص على كل جسمك ويجلس ربع ساعة لين تطلع كل الشوائب على سطح البشرة ، بعد كذا ترجعي لنفس غرفة البخار لعدة دقائق ويشطفون جسمك وبعدين مره ثانية يطبقون قناع على جسمك ونفس الشيء بالبخار شوي بعدين يشطفون جسمك لين تحسين بالنظافة و الانتعاش .

 

انطباعي :

حبيت من قلب الصابون ، لأن بحياتي كلها ماجربت الحمام المغربي إلا مرة وحدة بحياتي وعمري 19 سنة وكرهته هههههه ، لأن رحت عند وحدة تسويني وع بالي كذا بيكون شيء لطيف لكن كأنها استلمت جلد ميت وليفتها خشنة وجلست تفركني لين بكيت مره وجعتني غير إن البخار بالحمام كان مره قوي وكنت راح أموت أبغى أتنفس يعني ههههههه فمن بعدها ماعاد سويت أبداً لين جابت لي الجميلة من متجر أنا شيك هذا الصابون ، وخلتني أحب الشيء هذا وأفكر أرجع أجرب مرة ثانيه بأي صالون كويس أو مكان مختص ، حبيت ريحة المنتج ، حبيت كيف يترك بشرتي مرة مرطبه وكذا أحسها مشدودة ونظيييفة ، والأحلى إن بعد ماقشرت جسمي ولبست وخلصت وطلعت واحتريت وعرقت ! مافاحت مني ريحة المنتج نفسه ، لأن عارفين في ناس ماتحب الريحة هذه فيعني ماينفع أمشي وأفوح من نفس الريحة عند كل الناس وأزعجهم  ، استخدمه مرتين بالشهر وحبيت مفعوله بالترطيب وأتوقع لو استمريت عليه لشهور أكثر راح أشوف نتيجة اللون الموحد.


هل لو خلص راح أرجع اشتريه :

نعم بارجع اشتريه وباشتري معاه الليفة الخاص فيه .


هل أنصحكم فيه :

نعم أنصحكم في المنتج وخاصة للي ماتحب تروح صالونات ولا أماكن معينة يسوون الحمام المغربي أو حتى في ناس مايحبون يكشفون جسمهم كثير لأي أحد << محد يعبر عن نفسه .

 

مكان الشراء : 

- هنا -

 

 كثرت كلام أدري بس من قلب ودي أقولكم كل شيء مفيد أعرفه وأحس إنه بيفيدكم 

لو عندكم معلومات زيادة ممكن تشاركوني إياها تحت بالتعليقات 

 

عنايتي الخاصة بالمنطقة الحميمية !



عنايتي الخاصة بالمنطقة الحميمية 

مرحبا بنات
تدوينة اليوم هي في بالي من زمان بس مره مره مستحية أكتبها هههه
في وحدة طلبتني إياها قبل سنة يمكن وياحياتي جلست تطلبني تطلبني أكتب وكانت ترسل لي إيميلات وبكل مكان تكتب لي وأنا ودي أقولها يختي أستحي أكتب عن هذا الموضوع حتى ماعندي مصلطحات للي باشرحه بديلة ياصريح يابلاش ههههه
فكنت أقولها طيب طيب طيب لين اليوم تذكرتها ولو هي تتابعني ذحين أقولها * مرحبا شوفيني كتبت وتجرأت شوي*
 أنا متأكدة في بنات كثير يحتاجوا هذه التدوينة فرضاً في بنات يستحوا يسألوا أهاليهم أو في بنات ماعندهم حتى أحد يعلمهم
فبهذه النية أنا إن شاء الله باتكلم عن عنايتي البسيطة جداً ولكنها مرررره مهمة لكل بنت بغض النظر وباختلاف الخطوات والأشياء اللي استخدمها كل وحده وراحتها واللي يناسبها واللي تحبه ومتأكدة في بنات أسوأ مني وفي بنات أحس مني بمراحل :)

 أفتكر قبل فترة قرأت مدري شفت بجريدة ولا مجلة نسيت والله عن بنت عمرها 5 سنين وكيف أمها تهتم فيها
فكانت تقريباً تغسلها يومياً أو مرات بالغسول الخاص بالمنطقة طبعاً أنا مرة انصدمت قلت ول كيف كذا بس بعدين شفت صورة الغسول وكان مكتوب يناسب من سن 3 سنين أو 5 سنين ماني فاكرة والله ، ولكن خطوة جميلة جداً فقط لو كانت البنت بتعاني من إلتهابات أو شيء !! ، غير كذا ما أتوقع إنها تحتاج من صغرها لغسولات وأشياء زي كذا .

عني أنا أفتكر وأنا صغيرة مرة أمي سوت لي مغطس موية وملح مرة وحدة فقط ، أتوقع كان عندي مشكلة ولا شيء مافتكر ههههه بس حالياً لما بحثت عن المعلومة ، هي الحركة شيء كويس بس مانكثر منها لأن الملح بينشف المنطقة ، والمنطقة تحتاج تكون رطبة عشان ماتطلع منها روائح كريهة سبحان الله ، لو يجي الواحد يفكر يقول لا المفروض العكس إن الرطوبة تطلع ريحة والجفاف لا !

عموماً راح أوريكم إيش أستخدم وخطواتي البسيطة ، لأن كل مابسطتي الموضوع كل ماخف وسهل عليك إنك تسويه بدون ملل 




* جل حلاقة وموس حلاقة بثلاث شفرات *

اقتداء بسنة الرسول صلى الله وعليه وسلم : ( نتف الإبط ، وحلق العانة ) ، عشان ماتجرحين نفسك والمهمة تكون سهلة بالنسبة لك لازم وضروري ولازم مرة مرة يكون معاك جل حلاقة لما تشيلي بالموس ، وأنا مرة مرتاحة مع الموس هذا بثلاث شفرات يشيل بشكل أسرع وأنعم وبدون جروح ولا تأخير ، كل جمعة أو مع عنايتي الأسبوعية مرة مرة بسرعة أسويها لأن الشعر يكون يادوبه طالع وصغير فبيكون سهل ، للي ماتعرف أفضل إنك تشيليه كل جمعة وماتخلينه أكثر من أربعين يوم عشان نقتدي بالسنة اللي أكيد أكيد فيها حكمة ، وغير عن كذا عشان تبعدي عن تجمع البكتريا والفطريات والروائح بهذه المنطقة لأنها مقفلة ورطبة وماهي معرضة للهواء الطلق.


* غسول وفوط يومية *

 عشان أتحاشى الالتهابات اللي تحصل بالمنطقة ووكنظافة ، أستخدم الغسول مرة وحدة أسبوعياً من كير فري أكثر شيء مرتاحة عليه ومناسبني ، أعرف ذحين بنات يقولوا لا أحسن كل يوم ولا يوم بعد يوم ولا كل ثلاث أيام بس أنا بامشي على كلام أمي ، مرة أسبوعياً تكفي ، عشان مانقتل البكتريا النافعة بنفس المنطقة اللي سبحان الله تعيش بالرطوبة ولو استخدمنا الغسول كل يوم ونشفنا هذه الرطوبة بنقتل هذه البكتريا النافعة وتبدأ تطلع الروائح سبحان الله ، أيضاً أستخدم الفوط اليومية بأيام معينة ماهو كل يوم باتكلم لكم أول عن هذا النوع من أولويز أول مره أستخدم هذه العلبة يعني قد إيش أقولكم تجنن وعجبتني وحبيتها من قلب ، جربت قبل اللي تجي من كير فري أيضاً حلوة بس شوي تجي سميكة شوي مو مرة هذه عجبتني مرررره ، رقيقة كثير وصغيرة ومن الجوانب شفافة ولصقها قوي وماتحسين فيها أبداً أبداً ، باقولكم متى أستخدمها عارفين الوقت قبل ماتنزل الدورة بيوم ، سبحان الله المنطقة نفسها تبدأ تفرز كثير لها مسمى قد قالت عليه أمي بس نسيت المهم أول ما أشوف ذا الشيء ألبسها ع طول عشان أحافظ على نظافة ملابسي وأبدأ أتهيأ لها :)
أيضاً بنهاية الدورة الشهرية بالنسبة لي طبعاً مدري عن غيري ، اليوم الأخير أقعد من آول النهار لين آخر اليوم وآنا بكل خمس ساعات مثلاً نقطة وحدة تنزل ، فاستخدمها أيضاً بهذا الوقت لين أحس إني نظفت خلاص ووقفت تماماً مع الإفرازات ، يعني استخدمها تقريبا لثلاث أيام بالشهر ، مرة حلوة وتطول معاي علبة تكفيني 3 شهور تقريباً .


* فوط حماية للدورة الشهرية *

أنا عندي مشكلة مع الفوط ومستحيل أستخدم أي فوطة مستحيل عندي شروط فيها مهمة لازم تتوفر فيها ، يب يب لا تنصدمون مني ، أول شرط عندي لازم يكون عندي نوعين بغض النظر عن الشركة اللي تنتجها بس مهم يكون عندي نوعين نوع عادي والنوع الثاني طويل ، وأهم شيء النوعين يكونوا من النوع الرقيق أو اللي تجي نحيفة أو رفيعة ، النوع العادي أستخدمه خلال اليوم والنوع الطويل أستخدمه قبل النوم يكون أكبر وأطول كذا عشان ماتتسرب برا ، ومن الشروط أيضاً مايكون سطحها مصنوع من النايلون أكرهها أكرهها من قلبي وأتقرف منها وما أحبها ، لازم تكون من قطن وناااعمه عشان ماتتحس المنطقة منها وما أحسها تحبسها ، وكمان تكون بأجنحة عشان تثبتها وماتتحرك ، لو بتسألوني طيب أفضل شيء استخدمتيه أقولكم هذا النوع من كوتيكس هو الأفضل وأكون دقيقة أكثر أحب منتجاتها كوتيكس تجي خفيفة ورفيعة وكلها من القطن ماقد شفت يصنعون من النايلون زي أولويز أو تجي كذا منفوخة .


* مناديل تنظيف خاصة بالأطفال *

المناديل هذه أمي علمتني عليها الحركة من وأنا صغيرة ، طبعاً أيام الدورة بما إني ألبس قطعتين من الملابس الداخلية اللي هي أول وحدة كلوت أبو سبعة << عاد كذا أنا أسميه هههههه معاه الفوطه والبوكسر عليه عشان يمسك كويس وكل شيء يظل ثابت  ، فبما إني لابسه قطعتين أحتر وأعرق كثير بالذات المنطقة اللي في الفخد اللي تحتك ببعض كثير فبعض الأحيان بعض الأحيان بالنسبة لي يصير تسرب مع الحر والحرارة والرطوبة ( خاصة لو أول يوم مع الآلام أجلس بالقربة اللي مع الموية الحارة أسفل ظهري طول اليوم ) ، فقالت لي أمي لما يصير كذا ع طول أمسح بالمناديل فخوذي وكل مكان مر عليه التسرب عشان الوحدة تكون نظيفة عيب << أمي هههههه ، وبس كذا حتى لو عرقت نفس المنطقة مايطلع فيك ريحة ولا تتكاثر البكتريا والفطريات ليش لأن مره قرأت إن سبحان الله دم الحيض دم طاهر بس لما يطلع برا ويمر ع رطوبة المكان يصير فيه بكتريا وتطلع منه ريحه .

 
نصائح بشكل عام أبغى أفيدكم فيها :

 ♥ ملابسي الداخلية ما أحب أحد يشوفها وحتى لو حصل وتوسخت أبداً ما أعطيها الدادا تغسلها يعني حرام أنا أدوخ لو شفت الدم كيف لو هي مو خاص فيها وتقوم تغسله أحس عيب بكرامتها تغسلها لي .

♥ لو حصل وتوسخت ع طول أغيرها وأغسلها لو كانت نقطة صغيرة أغسلها تحت المغسلة بسرعة بيدي ولو مره توسخت أو تعدمت في حالتين أسويها أو كنت أسويها : زمان أمي اشترت لنا غسالة صغغغغيرة مرة كانت بالحمام حقي أنا وأخواتي كل ماتوسخت ملابسنا ع طول بالغسالة بالحمام من وقتها وخلاص وأصلاً هي كانت خاصة فينا وبملابسنا الداخلية ، طبعاً بعد مانقلنا للأسف أبوي شالها الغسالة ولحد ألحين ست سنين ماشترينا فصرت أسوي مثلاً لو وسخت كثير ع طول أنقعها بموية باردة بعد يوم كذا أغسلها بالغسالة ، عشان تنظف كويس وماتبقع ويبقى أثرها .

♥ لما تخلصي استخدام من الفوط وبترميها لفيها كويس بحيث مايوضح اللي بداخلها بعدين لفيها بمنديل وبعدين غلفيها بكيس اللي بتفتحيها الجديدة أو لو عندك أكياس صغيرة خاصة فيها ، أهم شيء لما ترميها بالزبالة عيب يبان منها شيء لأن هذا شيء يعني قرف وعيب بنظر اللي يشوفها من بعدك، دايماً جدتي الله يحفظها ويشفيها يارب تقولنا " عيب عيييب وحرام واحد من بعدك يجي وييشوف أو تجي عينه على هذا الشيء عيب بعينه يعني مكروه " لما أروح مثلاً أسواق ولا قاعات فرح ولا أي مكان وأدخل الحمام الزبالة الله يكرمكم تسد النفس إيش ذا حتى المناديل اللي تمسح فيه الوسخ طالع كذا إيش ذا القرف والله بعض الأحيان ودي استفرغ ، يعني الوحدة تخجل أحد يشوف من بعدها شيء خبي ونظفي كل شيء من بعدك سواء كانت فوط ولا مناديل عيب .

♥ اشربي دايماً قبل موعد الدورة نعناع دافي هذه نصيحة خالتي وطبقتها وبالفعل لو سويتها تنزل لي الدورة بدون أي ألم أو آلالام خفيفة ، وأيضاً لو حسيتيها تأخرت اشربي قرفة دافية عشان تنزلها لك وجربتها وبالفعل صحيح ، كمان أنا لما أستخدم الأوميقا ثري بانتظام تنزل لي الدورة بدون ما أحس فيها حتى نفسيتي تكون الحمدلله أهون من لو وقفت استخدامه ، طبعاً يختلف من بنت لبنت لكن جربوا يمكن تفيدكم المعلومة ذي .

♥ أتضايق من البنت اللي ماتعرف متى موعد دورتها ( ما أقصد البنت اللي غصباً عنها دورتها ملخبطة بسبب ظرف صحي خارج عن إرادتها أقصد البنت اللي دورتها منتظمة بس مايهمها تعرف متى تجي ولا متى تخلص ) ،  أحس عيب فرضاً أنتي عند ناس ولا رايحة مكان وفجاءة جتك وماعندك أي احتياط ولا شيء كيف تتصرفين ، صحيح تصير لي بعض الأحيان لما أنسى عشان ما أحسسكم إني ملاك وما أغلط وبيرفكت وكذا ،  بس مو دايماً يمكن مرة مرتين بالسنة ههههه ، فعشان كذا أنصحكم باستخدام برامج الجوال عشان تحسبها لكم وحطوا منبهه لو من النوع اللي ينسى ، باوريكم البرنامج اللي أستخدمه :

 

اسمه : Monthly Cycles - Period Tracker, Menstrual Calendar & Ovulation / Fertility Diary
هذا رابطه لو حبيتوا تحملوه 
في الآب ستور : - هنا -

مافي في الآندرويد نفس البرنامج بس لما كنت من مستخدمي الآندرويد كنت أستخدم هذا البرنامج مره يجنن وعاجبني أكثر من هذا 
اسمه : Period Calendar / Tracker
في الآندرويد : - هنا -


وبس هذه كل نصائحي 
أتمنى تكونوا استفدتوا لتدوينة هذا اليوم 
وأشوفكم بتدوينة بكرا إن شاء الله 


أربعين سؤال جمالي ♥




كم مرة تغسلين وجهك يومياً ؟

ع حسب صراحة لو ماسويت مكياج وماطلعت برا البيت يكون مرة وحدة وعكس كذا بيكون مرتين .

إيش هي نوع بشرتك ؟

بشرتي مختلطة معرضة للحبوب غالباً تكون حساسة .

ايش هو غسول الوجه الحالي الخاص فيك ؟

 من كلينك عرضته بهذا الفيديو - هنا -

تستخدمين مقشر خاص لبشرة وجهك وجسمك ؟

أكيد عرضتهم أيضاً بالفيديو - هنا -

ايش هو المرطب الحالي الخاص فيك ؟ 

للصباح أستخدم اللي عرضتهم بالفيديو - هنا - كريم التفتيح من أورنج دايلي معاه نقطتين من مرطب أفينيو عشان تركيبة الحماية من الشمس الموجودة فيه .

أفضل ماركة استخدمتيها للعناية بالبشرة ؟

امممم ماجربت أشياء كثيرة صراحة لما أستخدم شيء ويعجبني أجلس أعلق عليه لين أطفش منه وأغير لشيء وهكذا فلحد ألحين تجاربي مو مرة كثيرة مع العناية بالبشرة إن شاء الله خمس سنين كذا وأكون خبرة أكثر هههههه << ياعيني كيف نصبر P:

عندك نمش ؟

لا  

هل تتعرضين للحبوب / البثور / الرؤوس السوداء ؟

أكيد 
 
تستخدمين كريم خاص بمحيط العين ؟

 أكيد أتوقع باختم كريمات العيون ولحد ألحين مالقيت اللي يرضيني ويناسبني لأن كلها خلال اليوم تبدأ تحرقني عيوني وتدمع وأصدع وإلخ - حالياً أستخدم اللي بهذا الفيديو - هنا - وأيضاً نفس المشكلة لكن صابره عليه وأحط منه نقطة صغيرة .

تستخدمين واقي أو حامي من أشعة الشمس ؟

لو حسيت إني باتعرض للشمس مره كثير أكيد راح أستخدم بس دامني متغطية ومثلاً راح أروح مكان مغلق أو بالسيارة ماستخدم أتكاسل عنه .

تهتمين بشفايفك ؟

مره مره كثير أهتم فيها لأنها سريعة الجفاف والتشقق وغير كذا عندي حدود غامقة وأبحث عن حل لها .

كريم الأساس اللي تستخدمينه حالياً ؟
 
 أستخدم : 
ريفلون كولور ستاي 24 آورز 
لوريال ترو ماتش فريش بيج 
وبي بي كريم ميشا رقم 27

خافي العيون أو الكونسيلر اللي تستخدمينه حالياً ؟

من ريفلون وريميل 

إيش هو لون الأندرتون اللي تملكينه ؟

خمري أو زيتوني

إيش رايك بتركيب الرموش ؟

روعة للي يحتاج ومايحتاج للي مايحتاج *ولاكلمة لو سمحتوا*

هل تستمرين باستخدام الماسكارا حتى بعد انتهائها - بعد 3 أشهر من فتحها - ؟

مره إيوا ههههههه ويارب أبطل ويساعدني ضميري :(

أفضل ماسكارا عندك ؟

امممم ماقدر أقول وحدة بعينها لأني إنسانة أستصعب المفضلات من قلبي ماعندي شيء مفضل ههههه أرضى بكل شيء ماعندي مشكلة بس أحب الماسكرا اللي تكثف رموشي أكثر مما تطولها لأن الطول برموشي ممتاز ومايحتاج بس مشكلتي بنمو شعيراتها مخربط شوي يمين ويسار وشعر ينمو تحت وشعر ع فوق هههه فأحب اللي تجي بخاصية التكثيف عشان المشط اللي فيها يمشط ويرتب رموشي وكمان أحب اللي تخليها مرفوعه ومشدودة ع فوق بما إن شعر رموشي ناعم وطايح شوي لتحت << ياساتر ع التدقيق لا يسمعني إبراهيم الصالح بس هههههه

سيفورا أو ماك ؟

مايجي الاثنين :( أحبهم الاثنين والله مابختار سوري < طيب لاتطنقرين

هل تستخدمين كروت لتجميع نقاط من ماك أو سيفورا ؟

لا للأسف

إيش هي ماركات فرش مكياجك ؟

عندي من سيقما وهي الأغلب عندي من ميك أب فور إيفر عندي من فافافوم عندي من ذا بودي شوب عندي من إتش أند أم وعندي من الدرق ستور وغيرهم

تستخدمين برايمر للعيون / للوجه ؟

أكيد

ظلال مفضلة عندك - حتى لون واحد - ؟

 الظلال اللي عندي مختارتهم بحب وتعجبني 
عندي من نيكد وذا بالم وعندي من سليك 

تستخدمين كحل للعيون / آي لاينر ؟

كحل العيون أستخدم لو أقدر أقول مره بالشهر فقط لأن مازبط معاي ولا كحل تحرقني وتدمع عيوني وتنتفخ وطول اليوم أقعد أبكي * مو أبكي هي عيوني تبكي من الحرارة * فغالباً أتركهم وأتغاضى عنهم .
آي لاينر مع أغلب لوكاتي للمكياج عشان ماتبين عيوني إنها نعسانه هههه فيعني مع 99 % منهم .

تفضلين الظلال المطفية أو بشيمر ؟

بما إن عيوني وسيعة ما أحب أبداً أستخدم ظلال شيمرية كثير لأنو أحسها تكبر زيادة ويصير شكلي لعبه :(
فالكف يرجح بالمطفية أكيد D:
روج مفضل عندك دائماً ؟

أحب روج نيكس مات اسمه تي روز ودايماً معاي بالشنطة  .

ليب قلوس مفضل عندك ؟

ماحب الليب قلوسات كثير عشاني ما أحب الإحساس اللي تسويه وشعري يلزق فيها  .

بلاشر أو أحمر خدود مفضل عندك ؟

المفضل للأبد هو من جيفنشي رقمه 25 إن فوق أورنج 
أحب روز قولد من سليك 
وديزرت روز من ماك 
^ ماصار واحد *فيس متفشل*


هل تشترين مكياج من المواقع الصينية ؟

مستحيل

تحبين منتجات المكياج من الصيدلية - درق ستور - ؟

أكيد

سبق وأخذتي دورة تعليم مكياج ؟

 يب وعمري 16 سنة

هل إنتي - خرقاء في عمل المكياج ؟

لا الحمدلله لأني أملك موهبة الرسم فالمهمة سهلة بالنسبة لي وشوي صعبة لو سويت لغيري 

 منتج مكياج تكرهينه ؟

اممممم يمكن الليب قلوس بس مؤخراً قاعدة أغصب نفسي أحبه غصب لأنه حلو وأخواتي يقولون لما أحطه يحليني بس ما أحب شعوره ياخي بفمي *فبررللملميليملململمم* هفففف

منتج مكياج تعشقينه ؟

الماسكرا والروج والبلاشر 
اش في ؟
ماينفع أختار ثلاث ؟
يوووه طيب باختار واحد
روج 
لا ماسكرا
لا روج
خلاص روج آخر كلام D: 
 عشان فيه مليون درجة لون فحماس يعني كيوت < بوسة مووواه عليكم

تحبين المكياج الملون للعيون والشفايف ولا تميلين أكثر للألوان الأكثر طبيعية ؟ 

عشاني أستحي أولاً وثانياً عشان ما أصير كأني لعبه 
فأختار الألوان الطبيعية

مشاهير عندهم أفضل مكياج ؟

لاااا عاد ايش ذا السؤال اش دراني أنا هههههههه
بس أتوقع كلهم عندهم أفضل المكاييج *فيس يصيح ويبكي* ماشاء الله ربي يزيدهم ويزيدنا من فضله

منتج مكياج واحد مستحيل تتنازلين عنه إذا طلعتي من البيت ؟

الماسكرا 
لا الروج
لا الماسكرا 
رجعنننناااا هههههههه
مدري أبغاهم الاثنين *فيس يترجاكم ويبكي*

هل من الممكن تخرجين من البيت بدون مكياج ؟

على حسب صراحة 
 لو ناس أعرفهم مثلاً أهلي ونمون على بعض أروح لهم بدون مكياج عادي 
بس لو غير كذا ما أحب ، ما أحب الوجه الميت الأصفر يجي بس مع البجايم ووقت النوم

هل تعتقدين إنك جميلة بدون مكياج ؟

الحمدلله يارب :$
ترا ثقة بالنفس لاغير ! ولا ممكن لو بالحقيقة أحد شافني يهرب هههههه

أفضل شركة تنتج مكياج برأيك ؟

ماحب كلمة أفضل ياخي هههههه أحبها أوكي عشان ماتحجروني بعدين أحبها بحالات معينة 
بس زي كذا يعني كل الشركات تنتج أشياء كويسه وأشياء بطاله فماعرف يعني :(
اممممم نعصر مخنا شوي 
اممممممممم في ناموسة فوق راسي شكل أبوي يرش الزرع عشان كذا دخلت عندي << اش دخل ممكن تخلصينا 
طيب طيب هههههه أدور عذر 
اممممممممممممممممممممممم
ماعرف والله تعبت ماعرف ماحبيت السؤال 

3 كلمات تعبرين فيها عن المكياج ؟

جنة ومعزز للجمال والثقة بالنفس


وبس كذا خلصت أجوبه ع الأسئلة أنا أخذتها من موقع أجنبي وترجمتها للعربي 
لو حبيتوا الحركة اكتبوا لي تحت وأسوي لكم بإذن الله أسئلة كثيرة 
ولو حبيتوا البلوجرز الجميلات تشاركوني الأسئلة خذوا راحتكم ومنشنوني عشان أقرأ أجوبتكم وأتونس
وأشوفكم بإذن الله بتدونية جديدة غداً

بعض مشترياتي من آمازون ♥


 تونر للوجه المعرض للحبوب - هنا -


سبراي منعش للوجه بموية الورد والصبار والأعشاب - هنا


جل حلاقة برائحة ومكونات التوت - هنا


مرطب أفينيو - هنا -


مقشر سانت إيفز بالمشمش للعيوب والروؤس السوداء - هنا -


مقشر سانت إيفز بالشاي الأخضر للعيوب والبشرة المعرضة للحبوب والثور - هنا -


فرشاة رسم الحواجب من سيقما - هنا


فرشاة كونتور( تحديد الوجه ) من سيقما - هنا -


 اسفنجتين من البيوتي بليندر - هنا -


بودرة البن ناي ( بنانا ) - هنا -


فرشاة الوجة من ريل تكنيك - هنا -


بي بي كريم من ميشا - هنا -


كريم أساس لوريال ترو ماتش - هنا -


اثنين كريم أساس من ريفلون كولر ستاي - هنا -


عدة الحواجب من إيلف - هنا -


حامي الشعر من الحرارة - هنا -

* ملاحظة البرنامج اللي أعدل فيه الصور فيه مس بسم الله الرحمن الرحيم كل ما اخترت لون تأثير يطلع نفس تأثير هذه الصور مره مو عاجبني :( مدري إيش به إن شاء الله أحاول أعدله خلال هاليومين *

مرحباً وسهلاً ههههه
لا تسألوني ليش حطيت بعدها هههه كذا ودي أضحك *فيس مبتسم*
إحم طبعاً أخذت منكم رأي ع أساس أدون لكم كل يوم وعجبتكم الفكرة 
أمس وقبله جلست أفكر ياربي إيش أختار لهم تدوينات يعني ياترى تكون كلها عن التجميل ولا العناية ولا يوميات ولا إيش ؟
احترت مره وقلت راح أبدأ لكم بهذه التدوينة عشان بسم الله الرحمن الرحيم يعني تهطل علي الأفكار من بعدها ، يعني زي مايقولون لكم أول الخير قطرة ثم يَنهمرُ هههههه :) والله مدري ليش دخلت جملة التسمية بين الجُمل هههههه يارباه مني 

طيب اليوم باتكلم عن طلبيتي من أمازون وكيف وكذا بشكل عام
قبل فترة تقريباً وعلى ما أظن 4 شهور أو أكثر طلبت من وسيط عن طريق إحدى المنتديات - هنا - طلبات مرة كثيرة لي ولأهلي من مواقع عدة ، ممكن تسألوني ليش ما أخذتيها أو طلبتيها بنفسك عشان أكون معاكم صريحة الطلبات كانت مرة كثيرة وكنا نبغاها كلنا بذاك الوقت يعني ، فخفت صراحة أجازف وأطلبها كلها وأضيعها ولا ما أعرف كيف أسوي فيها وكذا ، فقلت يابنت أفضل أخليها على ناس خبرة ويعني إيش فرقت طلبني عمولة 60 ريال على أغراضي اللي كلفت فوق 1000 دولار تقريباً ، فحلال فيه يعني المهم اللي طلبته من أمازون كانت هذه الأغراض وحطيت لكم اللينكات أو الروابط حقتها تحتها في كمان طلبات طلبتها لأخواتي بس ماراح أعرضها لأني ماراح أجربها وكذا ، طلبتها وحولت الفلوس للرجال وجتني بعد شهر تقريباً على بال ماترسلت من التجار لحسابه في البريد الأمريكي أخذت تقريباً أسبوعين أو ثلاث أسابيع بعدين قالي على إيش تبغيني أشحنها قلت فيديكس بدون تردد قالي بس فيها سوائل ماراح يقبلها غير دي إتش إل ولازم تدفعين زيادة حقت رسوم سوائل خطرة قلت طيب ودفعت حقها تقريباً كانت 10 دولار قالي اختاري أي نوع تبغين الشحن واخترت الشحن اللي يوصلني لبيتي خلال بالكثير أربع أيام وطبعاً الأعلى سعراً لأنه بيوصلني بسرعة ، شحنها لي وماقصر وكذا انتهت مهمته ، وجلست أتتبع الشحنة لأكثر من 20 يوم وأنا أشد شعري وأصيح ومقهورة لييييش ماوصلتني وكل ماأفتح التتبع تروح وتجي من الظهران للبحرين من البحرين للظهران ، وأكلمهم وأتصل كل يوم وبالإيميل كل يوم ولا في فايدة كل شوي يجيبون لي عذر :( طيب لييييش تخلوني أدفع كل المبلغ هذا عشان توصلني بسرعة وبالنهاية تعلق بالجمارك لييييش :( بعد واسطة لاحظوا واسطة مو منهم جابوا لي شحنتي الحمدلله ، وياليتها جات كذا لا جابوها وغصبوا أبوي يدفع 240 ريال رسوم تخليص جمركي !!
كرهت الشركة والله من قلبي وكرهت حركة إني طلبت أغراض بكبرها انقهرت مره مره ، وعارفين ايش اللي يقهر زيادة وقتها كان في طلبات هدايا لحفل تقاعد أبوي وكنا مخططين إنها توصل قبل موعد الحفلة وجاء موعد الحفلة والأغراض بالجمارك أووف والله انقهرنا قهههههر راحت حلاوتها :( 

( لو حبيتوا تطلبوا من نفس الشخص اللي طلبت منه أعطاني حسابه 
بتويتر - هنا @US_KSA_Shipping

المهم مايستفاد من القصة :
♥ توبة أطلب طلبات كثير وفيها سوائل وأدخلهم كلهم بالدي إتش إل .
♥ لو عندي شحنة كبيرة ومضطرة أقسم السوائل بدي إتش إل والباقي بفيديكس أو أي شركة ثانية .
♥ لو عندي مناسبة أجهز وبغيت الهدايا تكون من برا أطلبها من قبل بشهرين وليس شهر تفادياً للتأخير .
♥ أنبهه أبوي من سالفة التخليص الجمركي قبل يروح ياخذها .
♥ ما أطلب شحنة تكون أكثر من 100 دولار بوقت واحد < ما كأنها تشبة النقطة الأولى هههههه .

عشان أكون صريحة معاكم ، يمكن في قوانين يمكن في أشياء أو أسرار بهذه الأمور أنا ما أكون عارفتها أو فاهمتها يعني مالي خبرة كبيرة بهذا المجال وأكون قلت شيء غلط أو نقطة غير صحيحة وكذا 

أترك لكم المجال تقولوا عن تجاربكم في الشحن أو نقاط نتبعها أو نصايح أو اللي تبغون ونتناقش فيها تحت بالتعليقات