أربعين سؤال جمالي ♥




كم مرة تغسلين وجهك يومياً ؟

ع حسب صراحة لو ماسويت مكياج وماطلعت برا البيت يكون مرة وحدة وعكس كذا بيكون مرتين .

إيش هي نوع بشرتك ؟

بشرتي مختلطة معرضة للحبوب غالباً تكون حساسة .

ايش هو غسول الوجه الحالي الخاص فيك ؟

 من كلينك عرضته بهذا الفيديو - هنا -

تستخدمين مقشر خاص لبشرة وجهك وجسمك ؟

أكيد عرضتهم أيضاً بالفيديو - هنا -

ايش هو المرطب الحالي الخاص فيك ؟ 

للصباح أستخدم اللي عرضتهم بالفيديو - هنا - كريم التفتيح من أورنج دايلي معاه نقطتين من مرطب أفينيو عشان تركيبة الحماية من الشمس الموجودة فيه .

أفضل ماركة استخدمتيها للعناية بالبشرة ؟

امممم ماجربت أشياء كثيرة صراحة لما أستخدم شيء ويعجبني أجلس أعلق عليه لين أطفش منه وأغير لشيء وهكذا فلحد ألحين تجاربي مو مرة كثيرة مع العناية بالبشرة إن شاء الله خمس سنين كذا وأكون خبرة أكثر هههههه << ياعيني كيف نصبر P:

عندك نمش ؟

لا  

هل تتعرضين للحبوب / البثور / الرؤوس السوداء ؟

أكيد 
 
تستخدمين كريم خاص بمحيط العين ؟

 أكيد أتوقع باختم كريمات العيون ولحد ألحين مالقيت اللي يرضيني ويناسبني لأن كلها خلال اليوم تبدأ تحرقني عيوني وتدمع وأصدع وإلخ - حالياً أستخدم اللي بهذا الفيديو - هنا - وأيضاً نفس المشكلة لكن صابره عليه وأحط منه نقطة صغيرة .

تستخدمين واقي أو حامي من أشعة الشمس ؟

لو حسيت إني باتعرض للشمس مره كثير أكيد راح أستخدم بس دامني متغطية ومثلاً راح أروح مكان مغلق أو بالسيارة ماستخدم أتكاسل عنه .

تهتمين بشفايفك ؟

مره مره كثير أهتم فيها لأنها سريعة الجفاف والتشقق وغير كذا عندي حدود غامقة وأبحث عن حل لها .

كريم الأساس اللي تستخدمينه حالياً ؟
 
 أستخدم : 
ريفلون كولور ستاي 24 آورز 
لوريال ترو ماتش فريش بيج 
وبي بي كريم ميشا رقم 27

خافي العيون أو الكونسيلر اللي تستخدمينه حالياً ؟

من ريفلون وريميل 

إيش هو لون الأندرتون اللي تملكينه ؟

خمري أو زيتوني

إيش رايك بتركيب الرموش ؟

روعة للي يحتاج ومايحتاج للي مايحتاج *ولاكلمة لو سمحتوا*

هل تستمرين باستخدام الماسكارا حتى بعد انتهائها - بعد 3 أشهر من فتحها - ؟

مره إيوا ههههههه ويارب أبطل ويساعدني ضميري :(

أفضل ماسكارا عندك ؟

امممم ماقدر أقول وحدة بعينها لأني إنسانة أستصعب المفضلات من قلبي ماعندي شيء مفضل ههههه أرضى بكل شيء ماعندي مشكلة بس أحب الماسكرا اللي تكثف رموشي أكثر مما تطولها لأن الطول برموشي ممتاز ومايحتاج بس مشكلتي بنمو شعيراتها مخربط شوي يمين ويسار وشعر ينمو تحت وشعر ع فوق هههه فأحب اللي تجي بخاصية التكثيف عشان المشط اللي فيها يمشط ويرتب رموشي وكمان أحب اللي تخليها مرفوعه ومشدودة ع فوق بما إن شعر رموشي ناعم وطايح شوي لتحت << ياساتر ع التدقيق لا يسمعني إبراهيم الصالح بس هههههه

سيفورا أو ماك ؟

مايجي الاثنين :( أحبهم الاثنين والله مابختار سوري < طيب لاتطنقرين

هل تستخدمين كروت لتجميع نقاط من ماك أو سيفورا ؟

لا للأسف

إيش هي ماركات فرش مكياجك ؟

عندي من سيقما وهي الأغلب عندي من ميك أب فور إيفر عندي من فافافوم عندي من ذا بودي شوب عندي من إتش أند أم وعندي من الدرق ستور وغيرهم

تستخدمين برايمر للعيون / للوجه ؟

أكيد

ظلال مفضلة عندك - حتى لون واحد - ؟

 الظلال اللي عندي مختارتهم بحب وتعجبني 
عندي من نيكد وذا بالم وعندي من سليك 

تستخدمين كحل للعيون / آي لاينر ؟

كحل العيون أستخدم لو أقدر أقول مره بالشهر فقط لأن مازبط معاي ولا كحل تحرقني وتدمع عيوني وتنتفخ وطول اليوم أقعد أبكي * مو أبكي هي عيوني تبكي من الحرارة * فغالباً أتركهم وأتغاضى عنهم .
آي لاينر مع أغلب لوكاتي للمكياج عشان ماتبين عيوني إنها نعسانه هههه فيعني مع 99 % منهم .

تفضلين الظلال المطفية أو بشيمر ؟

بما إن عيوني وسيعة ما أحب أبداً أستخدم ظلال شيمرية كثير لأنو أحسها تكبر زيادة ويصير شكلي لعبه :(
فالكف يرجح بالمطفية أكيد D:
روج مفضل عندك دائماً ؟

أحب روج نيكس مات اسمه تي روز ودايماً معاي بالشنطة  .

ليب قلوس مفضل عندك ؟

ماحب الليب قلوسات كثير عشاني ما أحب الإحساس اللي تسويه وشعري يلزق فيها  .

بلاشر أو أحمر خدود مفضل عندك ؟

المفضل للأبد هو من جيفنشي رقمه 25 إن فوق أورنج 
أحب روز قولد من سليك 
وديزرت روز من ماك 
^ ماصار واحد *فيس متفشل*


هل تشترين مكياج من المواقع الصينية ؟

مستحيل

تحبين منتجات المكياج من الصيدلية - درق ستور - ؟

أكيد

سبق وأخذتي دورة تعليم مكياج ؟

 يب وعمري 16 سنة

هل إنتي - خرقاء في عمل المكياج ؟

لا الحمدلله لأني أملك موهبة الرسم فالمهمة سهلة بالنسبة لي وشوي صعبة لو سويت لغيري 

 منتج مكياج تكرهينه ؟

اممممم يمكن الليب قلوس بس مؤخراً قاعدة أغصب نفسي أحبه غصب لأنه حلو وأخواتي يقولون لما أحطه يحليني بس ما أحب شعوره ياخي بفمي *فبررللملميليملململمم* هفففف

منتج مكياج تعشقينه ؟

الماسكرا والروج والبلاشر 
اش في ؟
ماينفع أختار ثلاث ؟
يوووه طيب باختار واحد
روج 
لا ماسكرا
لا روج
خلاص روج آخر كلام D: 
 عشان فيه مليون درجة لون فحماس يعني كيوت < بوسة مووواه عليكم

تحبين المكياج الملون للعيون والشفايف ولا تميلين أكثر للألوان الأكثر طبيعية ؟ 

عشاني أستحي أولاً وثانياً عشان ما أصير كأني لعبه 
فأختار الألوان الطبيعية

مشاهير عندهم أفضل مكياج ؟

لاااا عاد ايش ذا السؤال اش دراني أنا هههههههه
بس أتوقع كلهم عندهم أفضل المكاييج *فيس يصيح ويبكي* ماشاء الله ربي يزيدهم ويزيدنا من فضله

منتج مكياج واحد مستحيل تتنازلين عنه إذا طلعتي من البيت ؟

الماسكرا 
لا الروج
لا الماسكرا 
رجعنننناااا هههههههه
مدري أبغاهم الاثنين *فيس يترجاكم ويبكي*

هل من الممكن تخرجين من البيت بدون مكياج ؟

على حسب صراحة 
 لو ناس أعرفهم مثلاً أهلي ونمون على بعض أروح لهم بدون مكياج عادي 
بس لو غير كذا ما أحب ، ما أحب الوجه الميت الأصفر يجي بس مع البجايم ووقت النوم

هل تعتقدين إنك جميلة بدون مكياج ؟

الحمدلله يارب :$
ترا ثقة بالنفس لاغير ! ولا ممكن لو بالحقيقة أحد شافني يهرب هههههه

أفضل شركة تنتج مكياج برأيك ؟

ماحب كلمة أفضل ياخي هههههه أحبها أوكي عشان ماتحجروني بعدين أحبها بحالات معينة 
بس زي كذا يعني كل الشركات تنتج أشياء كويسه وأشياء بطاله فماعرف يعني :(
اممممم نعصر مخنا شوي 
اممممممممم في ناموسة فوق راسي شكل أبوي يرش الزرع عشان كذا دخلت عندي << اش دخل ممكن تخلصينا 
طيب طيب هههههه أدور عذر 
اممممممممممممممممممممممم
ماعرف والله تعبت ماعرف ماحبيت السؤال 

3 كلمات تعبرين فيها عن المكياج ؟

جنة ومعزز للجمال والثقة بالنفس


وبس كذا خلصت أجوبه ع الأسئلة أنا أخذتها من موقع أجنبي وترجمتها للعربي 
لو حبيتوا الحركة اكتبوا لي تحت وأسوي لكم بإذن الله أسئلة كثيرة 
ولو حبيتوا البلوجرز الجميلات تشاركوني الأسئلة خذوا راحتكم ومنشنوني عشان أقرأ أجوبتكم وأتونس
وأشوفكم بإذن الله بتدونية جديدة غداً

6 comments

  1. ايوة حلوة الحركة و البوست ممتع و مسلي كثري من هالنوع من التدوينات D:

    ReplyDelete
  2. حبيت التدوينة مرة
    ممتعه

    ReplyDelete
  3. رائعهـ تسلمممين

    ReplyDelete
  4. جميلة يعطيك العاافية قلبي❤

    ReplyDelete

♥رأيك يسعدني ♥ fell free and comment♥