عنايتي الخاصة بالمنطقة الحميمية !



عنايتي الخاصة بالمنطقة الحميمية 

مرحبا بنات
تدوينة اليوم هي في بالي من زمان بس مره مره مستحية أكتبها هههه
في وحدة طلبتني إياها قبل سنة يمكن وياحياتي جلست تطلبني تطلبني أكتب وكانت ترسل لي إيميلات وبكل مكان تكتب لي وأنا ودي أقولها يختي أستحي أكتب عن هذا الموضوع حتى ماعندي مصلطحات للي باشرحه بديلة ياصريح يابلاش ههههه
فكنت أقولها طيب طيب طيب لين اليوم تذكرتها ولو هي تتابعني ذحين أقولها * مرحبا شوفيني كتبت وتجرأت شوي*
 أنا متأكدة في بنات كثير يحتاجوا هذه التدوينة فرضاً في بنات يستحوا يسألوا أهاليهم أو في بنات ماعندهم حتى أحد يعلمهم
فبهذه النية أنا إن شاء الله باتكلم عن عنايتي البسيطة جداً ولكنها مرررره مهمة لكل بنت بغض النظر وباختلاف الخطوات والأشياء اللي استخدمها كل وحده وراحتها واللي يناسبها واللي تحبه ومتأكدة في بنات أسوأ مني وفي بنات أحس مني بمراحل :)

 أفتكر قبل فترة قرأت مدري شفت بجريدة ولا مجلة نسيت والله عن بنت عمرها 5 سنين وكيف أمها تهتم فيها
فكانت تقريباً تغسلها يومياً أو مرات بالغسول الخاص بالمنطقة طبعاً أنا مرة انصدمت قلت ول كيف كذا بس بعدين شفت صورة الغسول وكان مكتوب يناسب من سن 3 سنين أو 5 سنين ماني فاكرة والله ، ولكن خطوة جميلة جداً فقط لو كانت البنت بتعاني من إلتهابات أو شيء !! ، غير كذا ما أتوقع إنها تحتاج من صغرها لغسولات وأشياء زي كذا .

عني أنا أفتكر وأنا صغيرة مرة أمي سوت لي مغطس موية وملح مرة وحدة فقط ، أتوقع كان عندي مشكلة ولا شيء مافتكر ههههه بس حالياً لما بحثت عن المعلومة ، هي الحركة شيء كويس بس مانكثر منها لأن الملح بينشف المنطقة ، والمنطقة تحتاج تكون رطبة عشان ماتطلع منها روائح كريهة سبحان الله ، لو يجي الواحد يفكر يقول لا المفروض العكس إن الرطوبة تطلع ريحة والجفاف لا !

عموماً راح أوريكم إيش أستخدم وخطواتي البسيطة ، لأن كل مابسطتي الموضوع كل ماخف وسهل عليك إنك تسويه بدون ملل 




* جل حلاقة وموس حلاقة بثلاث شفرات *

اقتداء بسنة الرسول صلى الله وعليه وسلم : ( نتف الإبط ، وحلق العانة ) ، عشان ماتجرحين نفسك والمهمة تكون سهلة بالنسبة لك لازم وضروري ولازم مرة مرة يكون معاك جل حلاقة لما تشيلي بالموس ، وأنا مرة مرتاحة مع الموس هذا بثلاث شفرات يشيل بشكل أسرع وأنعم وبدون جروح ولا تأخير ، كل جمعة أو مع عنايتي الأسبوعية مرة مرة بسرعة أسويها لأن الشعر يكون يادوبه طالع وصغير فبيكون سهل ، للي ماتعرف أفضل إنك تشيليه كل جمعة وماتخلينه أكثر من أربعين يوم عشان نقتدي بالسنة اللي أكيد أكيد فيها حكمة ، وغير عن كذا عشان تبعدي عن تجمع البكتريا والفطريات والروائح بهذه المنطقة لأنها مقفلة ورطبة وماهي معرضة للهواء الطلق.


* غسول وفوط يومية *

 عشان أتحاشى الالتهابات اللي تحصل بالمنطقة ووكنظافة ، أستخدم الغسول مرة وحدة أسبوعياً من كير فري أكثر شيء مرتاحة عليه ومناسبني ، أعرف ذحين بنات يقولوا لا أحسن كل يوم ولا يوم بعد يوم ولا كل ثلاث أيام بس أنا بامشي على كلام أمي ، مرة أسبوعياً تكفي ، عشان مانقتل البكتريا النافعة بنفس المنطقة اللي سبحان الله تعيش بالرطوبة ولو استخدمنا الغسول كل يوم ونشفنا هذه الرطوبة بنقتل هذه البكتريا النافعة وتبدأ تطلع الروائح سبحان الله ، أيضاً أستخدم الفوط اليومية بأيام معينة ماهو كل يوم باتكلم لكم أول عن هذا النوع من أولويز أول مره أستخدم هذه العلبة يعني قد إيش أقولكم تجنن وعجبتني وحبيتها من قلب ، جربت قبل اللي تجي من كير فري أيضاً حلوة بس شوي تجي سميكة شوي مو مرة هذه عجبتني مرررره ، رقيقة كثير وصغيرة ومن الجوانب شفافة ولصقها قوي وماتحسين فيها أبداً أبداً ، باقولكم متى أستخدمها عارفين الوقت قبل ماتنزل الدورة بيوم ، سبحان الله المنطقة نفسها تبدأ تفرز كثير لها مسمى قد قالت عليه أمي بس نسيت المهم أول ما أشوف ذا الشيء ألبسها ع طول عشان أحافظ على نظافة ملابسي وأبدأ أتهيأ لها :)
أيضاً بنهاية الدورة الشهرية بالنسبة لي طبعاً مدري عن غيري ، اليوم الأخير أقعد من آول النهار لين آخر اليوم وآنا بكل خمس ساعات مثلاً نقطة وحدة تنزل ، فاستخدمها أيضاً بهذا الوقت لين أحس إني نظفت خلاص ووقفت تماماً مع الإفرازات ، يعني استخدمها تقريبا لثلاث أيام بالشهر ، مرة حلوة وتطول معاي علبة تكفيني 3 شهور تقريباً .


* فوط حماية للدورة الشهرية *

أنا عندي مشكلة مع الفوط ومستحيل أستخدم أي فوطة مستحيل عندي شروط فيها مهمة لازم تتوفر فيها ، يب يب لا تنصدمون مني ، أول شرط عندي لازم يكون عندي نوعين بغض النظر عن الشركة اللي تنتجها بس مهم يكون عندي نوعين نوع عادي والنوع الثاني طويل ، وأهم شيء النوعين يكونوا من النوع الرقيق أو اللي تجي نحيفة أو رفيعة ، النوع العادي أستخدمه خلال اليوم والنوع الطويل أستخدمه قبل النوم يكون أكبر وأطول كذا عشان ماتتسرب برا ، ومن الشروط أيضاً مايكون سطحها مصنوع من النايلون أكرهها أكرهها من قلبي وأتقرف منها وما أحبها ، لازم تكون من قطن وناااعمه عشان ماتتحس المنطقة منها وما أحسها تحبسها ، وكمان تكون بأجنحة عشان تثبتها وماتتحرك ، لو بتسألوني طيب أفضل شيء استخدمتيه أقولكم هذا النوع من كوتيكس هو الأفضل وأكون دقيقة أكثر أحب منتجاتها كوتيكس تجي خفيفة ورفيعة وكلها من القطن ماقد شفت يصنعون من النايلون زي أولويز أو تجي كذا منفوخة .


* مناديل تنظيف خاصة بالأطفال *

المناديل هذه أمي علمتني عليها الحركة من وأنا صغيرة ، طبعاً أيام الدورة بما إني ألبس قطعتين من الملابس الداخلية اللي هي أول وحدة كلوت أبو سبعة << عاد كذا أنا أسميه هههههه معاه الفوطه والبوكسر عليه عشان يمسك كويس وكل شيء يظل ثابت  ، فبما إني لابسه قطعتين أحتر وأعرق كثير بالذات المنطقة اللي في الفخد اللي تحتك ببعض كثير فبعض الأحيان بعض الأحيان بالنسبة لي يصير تسرب مع الحر والحرارة والرطوبة ( خاصة لو أول يوم مع الآلام أجلس بالقربة اللي مع الموية الحارة أسفل ظهري طول اليوم ) ، فقالت لي أمي لما يصير كذا ع طول أمسح بالمناديل فخوذي وكل مكان مر عليه التسرب عشان الوحدة تكون نظيفة عيب << أمي هههههه ، وبس كذا حتى لو عرقت نفس المنطقة مايطلع فيك ريحة ولا تتكاثر البكتريا والفطريات ليش لأن مره قرأت إن سبحان الله دم الحيض دم طاهر بس لما يطلع برا ويمر ع رطوبة المكان يصير فيه بكتريا وتطلع منه ريحه .

 
نصائح بشكل عام أبغى أفيدكم فيها :

 ♥ ملابسي الداخلية ما أحب أحد يشوفها وحتى لو حصل وتوسخت أبداً ما أعطيها الدادا تغسلها يعني حرام أنا أدوخ لو شفت الدم كيف لو هي مو خاص فيها وتقوم تغسله أحس عيب بكرامتها تغسلها لي .

♥ لو حصل وتوسخت ع طول أغيرها وأغسلها لو كانت نقطة صغيرة أغسلها تحت المغسلة بسرعة بيدي ولو مره توسخت أو تعدمت في حالتين أسويها أو كنت أسويها : زمان أمي اشترت لنا غسالة صغغغغيرة مرة كانت بالحمام حقي أنا وأخواتي كل ماتوسخت ملابسنا ع طول بالغسالة بالحمام من وقتها وخلاص وأصلاً هي كانت خاصة فينا وبملابسنا الداخلية ، طبعاً بعد مانقلنا للأسف أبوي شالها الغسالة ولحد ألحين ست سنين ماشترينا فصرت أسوي مثلاً لو وسخت كثير ع طول أنقعها بموية باردة بعد يوم كذا أغسلها بالغسالة ، عشان تنظف كويس وماتبقع ويبقى أثرها .

♥ لما تخلصي استخدام من الفوط وبترميها لفيها كويس بحيث مايوضح اللي بداخلها بعدين لفيها بمنديل وبعدين غلفيها بكيس اللي بتفتحيها الجديدة أو لو عندك أكياس صغيرة خاصة فيها ، أهم شيء لما ترميها بالزبالة عيب يبان منها شيء لأن هذا شيء يعني قرف وعيب بنظر اللي يشوفها من بعدك، دايماً جدتي الله يحفظها ويشفيها يارب تقولنا " عيب عيييب وحرام واحد من بعدك يجي وييشوف أو تجي عينه على هذا الشيء عيب بعينه يعني مكروه " لما أروح مثلاً أسواق ولا قاعات فرح ولا أي مكان وأدخل الحمام الزبالة الله يكرمكم تسد النفس إيش ذا حتى المناديل اللي تمسح فيه الوسخ طالع كذا إيش ذا القرف والله بعض الأحيان ودي استفرغ ، يعني الوحدة تخجل أحد يشوف من بعدها شيء خبي ونظفي كل شيء من بعدك سواء كانت فوط ولا مناديل عيب .

♥ اشربي دايماً قبل موعد الدورة نعناع دافي هذه نصيحة خالتي وطبقتها وبالفعل لو سويتها تنزل لي الدورة بدون أي ألم أو آلالام خفيفة ، وأيضاً لو حسيتيها تأخرت اشربي قرفة دافية عشان تنزلها لك وجربتها وبالفعل صحيح ، كمان أنا لما أستخدم الأوميقا ثري بانتظام تنزل لي الدورة بدون ما أحس فيها حتى نفسيتي تكون الحمدلله أهون من لو وقفت استخدامه ، طبعاً يختلف من بنت لبنت لكن جربوا يمكن تفيدكم المعلومة ذي .

♥ أتضايق من البنت اللي ماتعرف متى موعد دورتها ( ما أقصد البنت اللي غصباً عنها دورتها ملخبطة بسبب ظرف صحي خارج عن إرادتها أقصد البنت اللي دورتها منتظمة بس مايهمها تعرف متى تجي ولا متى تخلص ) ،  أحس عيب فرضاً أنتي عند ناس ولا رايحة مكان وفجاءة جتك وماعندك أي احتياط ولا شيء كيف تتصرفين ، صحيح تصير لي بعض الأحيان لما أنسى عشان ما أحسسكم إني ملاك وما أغلط وبيرفكت وكذا ،  بس مو دايماً يمكن مرة مرتين بالسنة ههههه ، فعشان كذا أنصحكم باستخدام برامج الجوال عشان تحسبها لكم وحطوا منبهه لو من النوع اللي ينسى ، باوريكم البرنامج اللي أستخدمه :

 

اسمه : Monthly Cycles - Period Tracker, Menstrual Calendar & Ovulation / Fertility Diary
هذا رابطه لو حبيتوا تحملوه 
في الآب ستور : - هنا -

مافي في الآندرويد نفس البرنامج بس لما كنت من مستخدمي الآندرويد كنت أستخدم هذا البرنامج مره يجنن وعاجبني أكثر من هذا 
اسمه : Period Calendar / Tracker
في الآندرويد : - هنا -


وبس هذه كل نصائحي 
أتمنى تكونوا استفدتوا لتدوينة هذا اليوم 
وأشوفكم بتدوينة بكرا إن شاء الله 


18 comments

  1. رنوش شو هاد علبة البخاخ الزهري اللي بالصورة فوق؟ ومن وين بتجيبيه بليييز ردي عليي :*

    ReplyDelete
    Replies
    1. هلا حبيبة قلبي <3
      هذا جل حلاقة تضغطي عليه يطلع لك رغوة تشبه الصابون تمسديها ع جلدك وتشيلي بالموس يشلك بسرررعه وبنظافة أخذته من أمازون أ[غى أجرب هذا النوع شفته مع يوتيوبرز كثير بس تلاقي جل حلاقة من نير مليان بكل الصيدليات والسوبرماركتات كنت أستخدمه قبل هذا <3

      Delete
  2. عنايتك نظيفة وبسيطة. انا اقشز المنطقة بسكراب خفيف للوجه مره بالاسبوع

    ReplyDelete
    Replies
    1. أتوقع إنه شيء كويس
      ماقد جربتها ولكن إن شاء الله باجربها وأشوف :)
      نورتيني <3

      Delete
  3. -ماشاء الله تبارك الله عنايتك مرا ممتازه..
    ياليت البنات المهملات يتثقفوا بهالأمور وياليت يهتموا لو أهتمام بسيط..
    - فيه معلومه أنه إذا جت الدوره أتجنب لبس الجينز والبناطيل الضيقه أو اللي يجي قماشها شوي ثقيل.. و ألبس ملابس قطنيه وفضفاضه عشان ماتنكتم المنطقه..

    الشيء اللي صدمني البنات اللي مايعرفوا موعد دورتهم..يعني ماشاء الله عليهم..
    أنا إذا قربت نفسيتي تتغير وأتنرفز من أي شيء حتى شعري لازم أرفعه..لدرجة أن الشعره من راسي لو تنزل على وجهي أعصب*ههههههه..

    -البنات اللي يتركوا أشيائهم الخاصه مرميه بالحمامات العامه غير أنه عيب !! هذا الشيءيعتبر أذى للمسلمات وأذى المسلم مايجوز..

    ربي يجزاك خير على التدوينه أكيد الأكيد بتنفع بنات كثيير يمكن يجهلوا مثل هالأمور أو مافيه أحد يعلمهم ويثقفهم ..

    ReplyDelete
    Replies
    1. الله عليك ذكرتي أشياء نسيت أذكرها وهي الجينزات والبناطيل والأقمشة الثقيلة ، مستحيل ألبسها خلال أيام الدورة حتى لو صادف وقت سهرة ولا أي زيارة مستحيل ما أحب ، أتجهه غالباً لليقنزات مريحة كثير وأحس إني أتنفس وماتنكتم المنطقة وتحبس كل شيء علي هههه !
      صدقتي من ناحية نقطة اللي ماتعرف متى تجي وأنا قصدت مثلاً اليوم نفسيتي تغيرت وقلبت وصرت منفسه وحالتي حاله هنا أعرف إن الدورة بتجي بس بالضبط متى مدري بعض الأحيان تكون بعد يومين بعض الأحيان بعد يوم ولا حتى أسبوووع !! عشان كذا حلو الوحدة تهتم بالبرنامج يحسب متى تجي بالضبط أي يوم وعاد الوقت ع حسب :)
      ويجزاك الخي رمره مره مره مره شكراً إنك ذكرتي نقاط نسيت أذكرها
      كذا أنبسط منكم كثير نساعد بعض ونفيد بعض
      نورتيني <3
      إ

      Delete
  4. والله محتاجين هالتدوينات وهالمواضيع تنتشر وخاصه مواضيع النضافه
    لان فيه بنات يستحون يسالون اهاليهم والجأون للنت والنت ماحسه وفا بهالناحيه

    " لما أروح مثلاً أسواق ولا قاعات فرح ولا أي مكان وأدخل الحمام الزبالة الله يكرمكم تسد النفس إيش ذا حتى المناديل"

    غرستي سكين بقلبي اييييييه بس متى بيتادبون هالبنات بالمدارس نفس الشي مايستحون والله ابد :(
    انا نضامي قديم اكتب بالورق موعد الدورة بس بحمل برنامج
    جميله التدوينة خفيفه مرة

    ReplyDelete
  5. الله يعطيك العافيه تدوينه جميله وربي يحفظ لك امك تعلمك بكل شي بفترة بلوغي معاناه ماحب اتذكرها ، بس الحمد لله من يومي اهتم للنظافه احس هالشي بالفطره مايحتاج احد يقولك خلي المكان نظيف من بعدك خصوصا انها مو بزر عمره سنتين ��
    فيه نقطه اوجعتني صراحه شوي واصيح ����
    الي ماتعرف دورتها هذي انا مو اني مهمله لا والله بس لان من بلغت والحين عمري ٢٣ ماعمرها انتظمت واشيل همها اخاف تحطني بمواقف محرجه ويوم كنت بالمدرسه كنت دايم اتجهز لها واظل شهور متجهزه لها عشان ماتفاجأني ودي اصير مثل باقي البنات دورتي منتظمه واعرف متى تجي حتى نفسيتي مايكون واضح ان دورتي قربت �� جربت اتعالج بس بمجرد اترك الحبوب يرجع كل شي مثل ماكان الله يشفيني��
    المهم اشكرررك جداا على مدونتك وقناتك وكل شي جميل تقدمينه ♥️♥️♥️

    ReplyDelete
  6. يسسسسعدك ياربب موضوعك جميل .
    برضضو نفس كلام الي قبلي في بنات كثير يحتاجو يتثقفوو بهالمواضيع
    بس حابه اسالك وش افضل جل حلاقه جربتيه
    وبرضو انا اعرف ناس يستخدمو الديتول كغسول مع مويا ومرا مرتاحين لو
    ويعطيك الف عافيهه

    ReplyDelete
  7. كل كلمة كتبتيها افادتني
    الله يعطيك العافيه ♥♥

    ReplyDelete
  8. بنسبة للغسول يقولون انه مضر وماينفع للبنت ؟ صح هالكلام ولا لا !

    ReplyDelete
  9. صراحة الموضوع جدا مفيد ومهم ...ﻷن البنت بالفتره هذي ﻻزم توعي نفسها بهذي اﻷمور *
    في نقطه ودي أقولها ;)
    ●ﻻزم البنت لما تجيها الدورة الشهريه تخبراختها او امها عشان تعرف كيف تتصرف وﻻ تستحي ﻷن هالشي يمكن يضرها او يسبب مشاكل *
    وشكراا♥♡

    ReplyDelete
  10. يعطيك العافيه ع النصايح مرة استفدت منها ..ربي يخليلك الماما ونصايحها ❤
    ايوا مرة شوفت ب التفاح الاخضر دكتور يقول م ينفع تستخدمو غسول او شامبو للمنطقه لانو هيا سبحان الله بتنظف نفسها ..
    تصدقي انا من البنات الي بستحوا يسئلوا اهاليهم ���� مدري ليه
    بس منجد واذا ابي استفسر من شي اسئل قوقل ..
    اقولك للمرة الثانيه شكرا شكرا بحجم السماء ❤❤

    ReplyDelete
  11. يعطيك العافية ❤
    ليش كذا ع البنات اللي مايعرفو موعد دورتهم انا من النوع اللي دورتي ع كيفها وما تجيني شهريًا ... استخدم نفس البرنامج ف الاندرويد حلو بس للي دورتهم منتظمة "(
    ترا اغلب اللي ما يعرفوا موعدها يكون ماعندهم انتظام ... انا من النوع اللي تنتظم مثلاً مرتين او ٣ ورا بعض بعدين تخرب وبرضو فترة الانتظام هذي ما تجيني كل شهر


    الله يعافيك ع الافادة ❤

    ReplyDelete
  12. عادي استخدم مكينة حلاقة ايمجوي المخصصه للمنطقة الحساسة اللي عشكل قلم بدل الموس؟

    ReplyDelete
  13. بخصوص النصيحه اللي قلتي فيها انو لازم الوحده قبل لا ترمي فوطتها تقفلها كويس
    خالتي موظفه بشركه والوظيفه شفتات بنات يجون بالمسااء وبنات بالصباح
    جاي صاحب الشركه يهزئ البنات لانهم يرمون الفوطه بالمرحاض تخيلي وسد المرحاض وصار يطفح
    قسم بالله انصدمت معقوله فيه ناس بهالوصاخه مسسستحيل

    ReplyDelete
  14. يسعددك يارب موضوع جميل ...ومرره استفدت منه ❤❤انا عمري 15 سنة ...وماحب اشيل شعر المنطقة الحساسةبالموسوماحب اشيله بالحلاوة لانها توجع ه
    بس ماقدد استخدمت كريم لازالة الشعر ..تنصحيني فيه ؟
    واي نوع اختار !

    ReplyDelete

♥رأيك يسعدني ♥ fell free and comment♥