مشترياتي من سيفورا ودبنهامز



 *الألوان تختلف بالطبيعة ، عشان سويت تأثير ع الصورة فطلع كأنها غامقة مره *

هذه بعض من مشترياتي من سيفورا ودبنهامز ، رحت أشتري شيء ع أساس كان عندنا مناسبة اللي هو زواج أولاد عمي ، من كثر ماني خايفة من الكوافيرات يسوون بوجهي خريطة قلت أحسن أسوي نفسي بنفسي وعلى مزاجي.

من اليمين :

كونسيلر من ميك أب فورإيفر واتربروف يعني ضد الماء وفُل كفر يعني تغطية كاملة 
حسب ماقالت الآدمية إن متوفر منه فقط 3 درجات ، أنا أخذت أغمق درجة رقم 8 من اللي كان متوفر ، أحتاج أجربها كثير عشان أعرف لو الدرجة كانت موفقة أو لا .

ميست مي جنتلي من جيفونشي
طلبتهم مثبت مكياج وأعطوني من جيفونشي مع إن وقتها ماقد سمعت عنه شيء أو حتى صادف أو قرأت بس قلت يلا أوكي لأن مالقيت من أوربن ديكاي المثبت وكان بنفس سعر هذا ، اللي تبيع قالت لي أبخه قبل المكياج وبعده عشان يعطي ثبات أكثر ولوك ديوي ، واللي مكتوب عنه بموقع سيفورا بخة قبل المكياج لإعطاء نعومة وانتعاش أو بعد المكياج لتعديل المكياج وإزالة الفائض وللتثبيت.

كومباكت بودرة دبل وير من إيستي لودر 
أنا أحب أخذ لو أخذت كريم أساس من الهاي إند أحب أخذ من نفس البودرة اللي تابعه لكريم الأساس لا تسألوني ليش بس قبل جربتها مع فاونديشن ميك أب فورايفر إتش دي وبالفعل في تناغم بينهم فضضضيع ومضبوط وشيء روعة لكن لو حطيت من باودر ثاني مايعطيني نفس لو ماكانت البودرة من خط الفاونديشن ، المهم أنا دخلت للأدمية وجلست تجرب على وجهي لين لقيت درجتي المناسبة عجبتني مره البودرة قلت لها في نهاية مخملية لها قالت تراهي كومباكت باودر قلت أها عشان كذا ههههه اللي هي تجيك تقدري تستخدميها كفاونديشن مع الموية والاسفنج أو كبودرة لوحدها عادي لحد ذحين مجربتها فقط كبودرة وعاجبتني تغطيتها ، مكتوب تستمر لـ 8 ساعات كثبات ، أخذت درجة 2W2 Rattan .

كريم أساس دبل وير من إيستي لودر
زي ماكتبت فوق أحب أخذ كريم الأساس والباودر معاه ، المهم أيضاً جلست تجرب علي لين حصلت الدرجة المناسبة مع إن أحس الدرجة مو مرة ناسبتني بس قدرت أرقعها بالبودرة بس فرضاً جاء يوم ماستخدمت الباودر مدري اش باسوي ، الدرجة حسيتها شوي غامقة يعني بنص درجة أو عشان من حولي فمي في شوية غمقان فمع الوقت قلب اللون ع رمادي خفيف معرف لحد ذحين ماجربته كثير بس مره بالزواج وتعتبر مخاطرة بس حضرة جنابي ماقررت إلا على آخر لحظة أسوي نفسي ، يستمر الثبات زي ماهو مكتوب لأكثر من 15 ساعة ، الدرجة اللي أخذتها هي 4N1 Shell Beige .

ماسكارا ذاي آر ريل من بينيفت 
ماساكرا عليها مدح كثير كثير من جميع الناس بس أحس أنا أخر وحدة تشتريها هههههه ، حلوة وتحمس وقوية لفتها وسوادها إن شاء الله أجربها أكثر وأقولكم عليها .

وبس كذا خلصت مشتريات طبعاً مكان الشراء كان من هنا وهنا :
كريم الأساس والباودر من دبنهامز 
والباقي من سيفورا 

الأسعار :
كريم الأساس والباودر بـ 495 ريال
الماسكارا أتوقع بـ 120 ريال
الكونسيلر أتوقع بـ 160 ريال 
مثبت المكياج أتوقع  بـ 155 ريال

في أحد مجربهم ؟ كيف كانت معاكم ؟




4 comments

  1. حبيت مُشترياتك وجت بوقتها♥ لأن كنت محتاجة لميك اب جديد ..
    ماسكرا ذاي ار ريل نفسك ههههههههههه حسيت اني اخر وحدة راح اشتريها لكن بعد كلامك عنها قررت اشتريها
    بالنسبه لكريم أساس ايستي لودر ايش رايك بتغطيته بدون البودره ؟ هل تغطيته ممتازة لان انا مثلك عندي شوية سمار حول الفم فعندي فضول بالنسبه لهالنقطه ؟
    - سجليني من متابعينك القدامى لكن تو افكر اكتب كومنت - أسماء (و)*

    ReplyDelete
    Replies
    1. وأنا حبيتك <3
      ههههههههه لا أجل دام إنتي لسه وبنات بالانستقرام فمني آخر وحدة ههههههههه D:
      تغطيته ممتازة ويعطيك مات فينيش أنا أخذت البودرة لأن من خشمي وذقني وجبهتي باختصار منطقة التي زون تدهن مرة وبالفعل بالمناسبة ساعتين والمنطقة مدهنة ، بس المناطق الباقية جداً بيرفكت بس أشوفها تغطية سهرات مو يومية أو مناسبات بسيطة ، أما ع المناطق المسمرة يعني ماهي ع التغطية هي ع درجة اللون لأن أنا ما أخذت كوريكتر تصحيح لون بس الأيام الجاية بإذن الله يكون عندي ويصير استخدمه حول فمي لأن حتى أصلاً مو باين مرة بس أنا عشان أدقق أشوف لون صار رصاصي ههههههه .

      حبيبة قلبي أسومة شرفتيني ونورتيني ودايماً اكتبي لي<3

      Delete
  2. انا لا افهم لمذا تخاطرين بكمية هائلة من المال لشراء كريم اساس لا يليق بك

    ReplyDelete
  3. انا لا افهم لمذا تخاطرين بكمية هائلة من المال لشراء كريم اساس لا يليق بك

    ReplyDelete

♥رأيك يسعدني ♥ fell free and comment♥