مشترياتي من مكياجي ♡






من اليمين أعلى :

برونز 22K غلوينغ باودر برونزي لامع معرض للحرارة رقم 01
كريم أساس 22K كابتيفيتينغ سائل أساس لتبييض البشرة رقم 06
باودر 22K ألومنيتينغ باودر مضغوط رقم 06
أكحال صبايا قلم لاين آند شادو
آي لاينر صبايا محدد العيون السائل

بداية بأحكيكم عن بنت عمي ولون بنت عمي ، لونها يجنن بالطبيعة بسم الله عليها ، يعني أقصد لون بشرتها الطبيعي كأنها مسويه برونز ذهبي سبحان الله ، لونها قمحي بجد نفس لون القمح ، المهم كنت أشوفها دايماً بلوك غامق أو أفتح منها فتصير البنت رماديه نفس حالة الأغلب وأنا منهم ههههه ، فبعدها شفتها فجاءة بمناسبة قلت واااااه يابنت مين مسوي لك مكياج ؟ قالت أنا سويته ! قلت مستحيل مستحيل الدرجة تجنن عليك لونك يهبل وبشرتك طالعة مخملية مره ، وربي يابنات كل شخص يجي من بعدي صار يقولها نفس الكلام بسم الله عليها ، يعني تحسونها صارت قطعة وحده لون جسم ووجه ، المهم قلت لها ماقدر أسيبك لازم تعلميني ايش استخدمتي أساس وبودرة مكياج ، قالت خلاص أوصل البيت وأرسل لك صورتهم قلت طيب .

رجعنا البيت وأرسلت لي الصورة وكانت المفاجاءة : تتراراراااه ، يب يب كريم أساس وباودر مضغوط من مكياجي ، مو عن انتقاص لهذه الماركة ، بس من زمان ماتجذبني ، أشوفها تناسب البنوتات من تحت 18 سنة ، يعني مكياجهم وكذا أحسه يشبه ذا بودي شوب فيه الحلو وفيه اللي ماش ، عموماً لما شفت الصورة انصدمت قلت معقوله كل هذاك الثبات واللون اللي يجنن من مكياجي والله لأروح على طول اشتريهم مو بس أجربهم هههههه ( ولو إنه لازم تنتبهي اختلاف الاندر تون ولون البشرة بينك وبين غيرك ، يعني أنا وبنت عمي مختلفين هي أفتح وأندرتونها أصفر فهي أقرب مايقال لونها قمحي وأنا خمري ) المهم حوسة درجات الألوان ههههههه ، رحت لمكياجي فرع عزيز مول ، ودخلت قلت لها أبغى أشوف هذول الإثنين وبالدرجات هذه قالت ابشري ، وورتني وجربت ع وجهي .

أول انطباع لهم كانوا غامقين على بشرتي ، واستغربت قلت ول كيف بنت عمي أفتح وجاي عليها يجنن ، بعدين قلت براسي يمكن يحتاج وقت لين يتأقلم على لوني مو مشكلة لازم أجربه ، طبعاً وقتها قالت لي البائعة في عرض أخذ 3 حاجات بـ 100 ريال وعليها أو بـ 90 نسيت ، بس كان عرض حلو فقلت أوكي أجل راح أخذ كريم الأساس والباودر المضغوط وجلست أجرب كم حاجة ماعجبني غير البرونز وأخذته ، ورحت لركن صبايا وأيضاً كان فيه عرض 3 حاجات بسعر 90 ريال أتوقع ، أخذت أقلام كحل عيون مع إن عيوني ماش ماتستحمل أي كحل بس قلت أعطيهم فرصة أجرب ، أخذت لون بني للصباح لو بيغت أكحل عيوني أو أسوي آي لاينر وأخذت تركواز تقريباً أو ع قولة المتداول تيفاني هههههه ، وأخذت آي لاينر قلت أجربه كمان .


رجعت البيت وحصل إن ثاني يوم كان عندنا مناسبة قلت بنفسي يلا يارنا جازفي وجربيه بهذه المناسبة ( لاحد يقلدني ترا طريقتي غلط ، لازم تجربينها قبل عليك عشان ماتنحرجين ، بس المناسبة كانت بين أهل أبوي فلو خربت باروح اغسل وجهي وعادي هههه ) ، المهم مديت كريم الأساس وحطيت البادور طالعت بلوني ، غمقتني تقريباً من درجة لدرجتين بس طلعت بالفعل مخملية ، ليش ؟ عشان الباودر مضغوط !! وهذه نقطة جميلة لصالحهم ، تركتها قلت نشوف كيف بتصير مع الوقت ، رحت المناسبة ورجعت أخواتي مجننيني يقولوا اللون مره فضيع عليك !! بغيت أنجن من الفرحة ، اللون بعد عشر دقايق تقريباً مسك ع بشرتي يعني فتح شوي ولا صار رمادي ولا شيء طلع لوني مره حلو ، أخواتي يقولوا كان في اختلاف مره مايذكر بس عشان احنا ندقق بقوة كان في اختلاف بيني وجهي وجسمي ، ايش الطريقة الصح ؟ زي ماسوت بنت عمي تقول أمده ع كامل جسمي كريم الأساس وأثبت وجهي بس بالباودر وصارت البنت حاجه لؤطة ، باختصار مره عجبوني ولو إن كريم الأساس حسيت تغطيته مره خفيفه بس حلو والباودر أجمل وأجمل يعطيك نهاية مخملية خلتني أوعد نفسي بعد كذا ما أشتري غير باودرات مضغوطة عشان النهاية المخملية الفضيعة .

الأكحال والآي لاينر ، لحد ذحين ماجربت غير اللون البني بالصباح كنت رايحة المستشفى سويت منه ع خفيف ، حلو اللون ماحمرت عيوني كثير ولا تحسست بس لسه أحتاج أجرب أكثر ، أما الآي لاينر من ثاني تجربه ماعجبني ، يقطع ومره خفيف وفرشته قاسية تتعب بالرسم شوي للي مايعرف .

عموماً عموماً أحتاج أجربهم كلهم كمان زيادة وأقولكم عليها بالتفصيل كيف كانت معاي أوكي ؟ أوكي :-}


4 comments

  1. رؤعهه ماشاءالله تابعي جديدك الافضل والافضل لك ي رائعه

    ReplyDelete
  2. ماشاءالله كل وحده تختلف عن الثانيه
    احبكك رنوششش

    ReplyDelete
  3. مرة كان عندهم عرض اخذت ماسكارا لون علبتها ازرق ومحدد اتعب وانا اقولك روعه المحدد لونه قوي الماسكارا حلوة جميلة بس فيها عيب واحد فرشتها تاخذ كثير من المنتج بس عادي خذي منديل وشيلي الزايد واستخدميها تنصدمين لون الماسكارا اسود وعلبتها ازرق فاتح او سماوي تقريباً جربيها ، انا كمان كانت عندي هذي الفكرة عنها بس عند انصدمت منهم

    ReplyDelete
  4. تجربة حلوه ، و بنت عمك ربي يسعدها على مشاركتها لك بسر جمال مكياجها ، في بنات مايحبون يعلمو احد و حركات بايخه ، و الحلو بالموضوع أنه ناسبك كمان .. افكر اشتريه هديه لبنت أخويا ان شاء الله .

    شكراً رنا 💚


    Goodluck

    جولزا

    ReplyDelete

♥رأيك يسعدني ♥ fell free and comment♥