Laura Mercier Tinted Moisturizer Oil Free | لورا مرسييه المرطب الملون الخالي من الزيوت






بنات الجامعة بنات الدوام كل البنات المهتمين ببشرتهم وقت الصباح والظهر والدوام والحر وطبعاً معليش كل أوقات السنة عندنا حر فهذا الشيء مصنوع لكم عشان تستخدموه في الصباح على مدار السنة ، مرطب ملون خالي من الزيوت يعني مرطب يرطب بشرتك في الصباح خلال الدوام بنفس الوقت فيه كمية لون تعطيك وجهه مرتب مصحصح في الصباح بدون ماتتعب بشرتك وتثقلين عليها زائد إنه أويل فري يعني خالي من الزيوت يعني إن شاء الله مافي حبوب مع الحر ومافي تي زون مدهن ..

أحس إني كالعادة أخر وحدة اشتريته ههههه بس حبيت فكرته وماعمري قد جربتها خصوصاً إنه يشمل كذا نقطة حليوة ، حماية من الشمس 20 SPF وترطيب وكأنك حاطة فاونديشن بس خفيف جداً كذا يعطيك مظهر جلوي ومناسب للاستخدام اليومي والاستخدام الصباحي عشان مايكون شكلك مره أوفر ..

تجربتي معاه خلال 4 شهور كانت تجربة جيدة جداً ، كترطيب مره حلو ومناسب الحمدلله ماطلع لي حبوب من استخدامه ، كتغطية خفيييف مرة معطيني كذا مظهر جلوي يعني بشرتي ماهي مره مطفية ولا تلمع تصير وسط ، كان عندي أثر حبة مره كبير وغامق شوي لأن الحبة كانت كبيرة شوي فماغطاها تماماً ، يعني ظلت واضحة ( بعد ماستخدمه أغطيها بكونسيلر )، بصراحة ماقدر استحمل وأرجع أثبته بباودر لأن كنت أقرأ ريفيوز كثيره عنه قبل اشتريه وكان بعض الناس يستخدمونه بدون وحابين النتيجة عليهم ، بس أنا ماحبيت لازم استخدم باودر بعدهم ، ثباته بعد ساعتين تقريباً أو حتى أقل بشرتي وخصوصاً التي زون يكون مدهن بس كتغطية تظل نفس ماهي ماتتغير إلا بعد خمس ساعات حسيت إن وجهي سايح فعلاً  ، بس بصراحة مو الشكل يكون زي لو مثلاً حطيتي مكياج من كريم أساس وبادور أساسي بيكون مع الحر وجهك مخبص بقوة فأحسن الواحد وقت الصباح يكون بالسيف سايد ويحترم عيون الناس شوي ويحترم مشاعره لما يطالع بالمرايا بعد مايخلص دوام هههههه ، أيضاً الحلو بعد ماتشيلي المكياج من وجهك بتلاحظي وجهك مرطب وحلو ..

كيف استخدمه :
بعد ماغسل وجهي استخدم السيريوم وكريم العين ومرطب الشفايف ، بعدها أحط نقطتين بخدي اليمين واليسار ونقطة بجبهتي ونقطة بخشمي ونقطة بذقني ، بعض الأحيان استخدم فرشاة زويفا اللي حاطة صورتها فوق رقمها 124 جراند ستيبلينق أو غالباً أمده بيدي صراحة أحس يندمج بشكل أحلى من لمن أستخدم الفرشاة لأن أنا إنسانة اقتصادية ههههههه فما أبغاه يخلص استخدم نقط معتدلة على وجهي وامده بيدي فيندمج بشكل أفضل مع دفاة أصابيعي أما لو استخدمت الفرشاة نص المنتج بيدخل بين شعيرات الفرشاة وتصير التغطية مره أخف وهي قدها خفيفة مرة فباضطر أزود زيادة لين اضبط البشرة ، بس لو بغيت استخدم فرشاة بالتوزيع ع طول أروح للستبلينق برش  أطب طب على بشرتي وأنا أمد المرطب لين تتغطى بشرتي كويس ، عاد كل وحدة وراحتها بس أحس أنا كذا مناسبني الوضع والطريقة ، بعدها استخدم الباودر وخصوصا على التي زون وخلاص أكمل باقي الاشياء إن شاء الله التدوينة الجاية راح اتكلم عنها وعن طريقة مكياجي للدوام الصباحي .

اخترت أقرب درجة لبشرتي وهي OCHRE وودي أجرب درجات أقرب ثانية لأن ماحسيتها مية مية بس تظل حلوة .

اشتريته من - هنا

خلاصة التجربة :
أحس لو أنا أداوم في مكان مغلق ومكيف في الصباح ممكن استبدله بكريم أساس لأن أحس معظم كريمات الأساس بتطول أكثر من المرطب هذا غير عن تغطيتها بتكون أكثر بس طبعاً مو كريمات أساس السهرة والثقيلة في كريمات أساس خفيفة وحلوة وتغطي أكثر من المرطب الملون أو التينتد موسترايزنق ، لكن لو دوام مدرسة مثلاً أو جامعة أو بمكان فيه شمس ومفتوح مية مية راح استخدم هذا المرطب غير عن حمايته الجميلة يعني 20 SPF غير أحس ان مع الحر والجو والشمس مازالت بشرتي تتنفس ، هذا رأي بشكل مختصر وتجربتي بشكل عام .. 


No comments

♥رأيك يسعدني ♥ fell free and comment♥