Lash Queen Feline Blacks Mascara by Helena Rubinstein ❤ ماسكارا هيلينا روبنيشتاين





الماسكارا عليها ضجة كبيرة ، وأغلب التقييمات عالية جداً ، من هنا قلت والله لازم أجربها لو تكلفني كم !
 خصوصاً إنها تناسب العيون الحساسة وهذه من أكبر المشاكل عندي اللي تصير معاي ومع الماسكارات .

الماسكارا من هيلينا روبنيشتاين ، بحثت عنها بالعربي ولقيت كم حبة ريفيو ، وبالعربي كمان كانت الريفيوز عنها ممتازة وتقييمها عالي ، بس بالنسبة لي ماراح تكون كذا .

اشتريتها قبل زواجي بفترة ، واستخدمتها كذا مرة لحد ذحين مع إن المفروض أرميها لأنها كملت 3 شهور عندي D: ، نجي نتكلم أول شيء عن الشكل جميلة جداَ مسكتها حلوة وملمسها أحلى ، أحس إني قد شفت نفس شكلها بالضبط بس تقليد لمسكارا الألياف ، لو كانت بدون الرسمات النمرية أحسها بتكون أفخم وتستاهل سعرها ، الريحة حلوة ولطيفة تشبهه ريحة مسكارات ثانية بس على ألطف بمراحل ، فرشتها ناعمة وماتعور أبداً ، قد قلت لكم قبل فترة طويلة مرة بالانستقرام عن مسكارا بنيفيت وقد ايش تعور بالعين فرشتها وتجيب صداع ، هذه مختلفة تماماً فرشتها ناااعمة وفعلا فعلاً مناسبة للعيون الحساسة الدلوعية ، تمشيطة فرشتها بالنسبة لي تناسب اللوكات الناعمة ، طبعاً لو تقرأو الريفيوز عنها كثير يستخدموها للوكات سهرات ومش عارفة ايش ، لأنها بتعمل لهم كثافة ولوك أقوى ، أما بالنسبة لي عملت لي فقط تطويل وفرقت لي الرموش بشكل ماحبيت عيني فيه ، صار في فراغات واضحة بين عيني كذا مدري كيف أشرح الشكل ، بس مالمت لي شعرتين شعرتين مثلاً لا ! ما أعرف كيف الشرح بس حسيت كأن رموشي صلعاء هههههه ، ناعمة مرة مرة هذا ليش أقولكم تنفع للوك صباحي أو لوك ناعم أو لوك الميك أب نو ميك أب .

الحلو والسلبي فيها :

 الحلو فيها : مكوناتها ماسببت لي حساسية ولما أحطها وأقعد طول اليوم فيها مافي نقطة صداع الحمدلله ، فرشتها ناعمة جداً تمشطين رموشك بدون ماتدمعين وتحمر عينك وتتحسس ، لو احتجت أسوي لوك ناعم أو أسوي فيها مرات على زوجي إن رموشي جميلة طبيعي أحط منها ، تسوي تطويل فضيع رموشي تصير طويلة مرة بس ماشوف أي كثافة أو الرمشة تتغلف بضعف ويصير شكلي كأني مركبة رموش طبيعي ماشفت هذا الشيء ، سريع سريع تقدرين تشيلينها من عينك بدون صداع بدون تنتيف رموش .

السلبي فيها : ماسوت لي كيرلينق لرموشي ، كذا أشوف رموشي نايمة على تحت زي ماهي ! إذا كثرت أكثر من طبقة أشوف الطول يزداد أكثر من الكثافة ، سعرها غالي جداً بالنسبة لمسكارا وبالنسبة لشيء استهلاكي درجة أولى في المكياج ، ماهي متوفرة هنا وع بال تطلبينها تحتاجين مشوار طويل .

سعرها ومن فين اشتريتها :

اشتريتها بحدود 45$ { 168 ريال } من أمازون - هنا - احتاجت شهر كامل ع بال توصل للبريد وذحين كاتبين سعرها مخفض .

ليش زعلانة منها ؟

بس زعلانة من نفسي مو من أحد ثاني ، زعلانة بإن ممكن السمعة والضجة تخليني أنصدم من أشياء ، كمان مو معناه إن هم كذابين ولا كلام فاضي ! ممكن بالفعل كانت المسكارا المنشودة بالنسبة لهم ممكن رموشهم مختلفة عن شكل رموشي فبرزت جمالهم بس بالنسبة لي أنا لا أبداً ، بس الماسكارا جميلة من نواحي تركيبتها للعيون الحساسة هنا أعطيها تقييم عالي بس ع النتيجة النهائية وشكل رموشي اممممم لو كانت متوفرة قدام عيني وبسعر أرخص كمان ماراح أشتريها .



1 comment

  1. تقييمك عجبني عشان كذا مره مفيد تقري عن الشيء قبل تقرري تشتريه الآراء المختلفة تعطيك فكرة أكبر عن المنتج
    و الحاجة اللي ما ركزت عليها بنت بتركز عليها بنت ثانية ..
    حبيت البوست <3

    ReplyDelete

♥رأيك يسعدني ♥ fell free and comment♥