تجربة : آلة حلاقة شعر البكيني من براون ..




أهلين بنات ..
نزلت لكم في السناب عن هذه الآلة 
Braun Silk-épil FG1100 - Bikini Hair Removal Electric Shaver, Styler, and Trimmer for Women
وقلت لكم هي أفضل آلة جربتها من خمس سنين تقريباً لمنطقة البكيني
وماتوقعت كمية الاستفسارات هذه كلها .. بصراحة مابغيت حتى أنزلها بالسناب جلست أقول ياشيخة ياقديييمة أكيد الكل يعرفها ..
بس تفاجاءت إن في كثير مايعرفها وطلبني أكتب عنها أكثر ..


أول حاجة الآلة هذه قبل خمس سنين تقريباً جات هدية مع آلة نزع الشعر للجسم وووقتها فتحتها وخليتها ع جنب وقلت مالها داعي اكسسوار زايد لو فيها فايده ماخلوها هدية .. آسفه ع التفكير السطحي ههههه ، بعدييين جاء يوم وكذا وفتحتها وجلست أتفرج فيها وقلت لازم أجربها وجربتها من يومتها وعجبتني كثييير ، وصرت ما أستغني عنها ، لو تتذكروا قد كتبت موضوع عن العناية بالمنطقة الحساسة - هنا - ووقت ماكتبت الموضوع جلست أقول هل أضيفها بالموضوع ولا ماله داعي بعدين سويت عليها سكيب Skip وقلت لا مو لازم .. بس ذحين ندمانه إني ماتكلمت عنها بوقتها لأن ممكن ماتصدقون بس هذا الموضوع اللي كتبتها وقتها يعتبر من أكثر المواضيع زيارة في مدونتي ، بس مو مشكلة ذحين كتبت لكم بموضوع منفصل وإن شاء الله تستفيدوا منه وينال استحسانكم .. 

الآلة من شركة براون بإمكانك تستخدميها للبيكيني للحواجب للشنب وللوجه عموماً .
الآلة شكلها زي الإصبع خفيفة وصغيرة ويجي معاها ملحقات وعددها ٩ وهي :
*رأس خاص بالبكيني .
*رأس خاصة بالتحديد سواء للوجه أو البكيني .
*ورأسين أتوقع هم لتمشيط شعر البكيني وتشذيبها بس مدري لأن ماوصلت لذي المرحلة هههه .
*ورأس غطاء للآلة .
*وبطارية .
*فرشاة تنظيف الشعر .
* ستيكرات منوعة عشان لو حبيبتي تسوي ستايلنق بالمنطقة على نفس الأشكال .
* كيس أبيض لحفظ الآدوات .

الآلة ماتنزع الشعر هي فقط تحلق .. وفي كثير بنات سألوني وقالوا سيئة ماتحلق تماماً هي في الحقيقة الآلة مختصة بالاستايلينق يعني تزبطي ترسمي تعدلي الحلاقة بالبكيني يعني ماهي مخصوصة للحلاقة بالصفر زي مايسوي الموس بالضبط .. هذه وحدة من الأسباب اللي خلتني أسوي سكيب عليها بالموضوع اللي كتبته عن العناية بالمنطقة الحساسة .. لأن خفت الكل يحكم أنها سيئه ووقتها ماكان الموضوع أشرح بشكل كامل عن الأداة كثر ماكان عن موضوع العناية بشكل أكبر وليس الحلاقة .

الآلة جداً جميلة في وقت مثلاً ماتكوني ماسويتي حلاقة لمدة أسبوعين أو حتى أكثر وقتها الشعر بيكون طول شوي أو طول بزيادة فماينفع تحلقي ع طول  بالموس راح تجرحي نفسك بزيادة وبيكون الحلق تقريباً شبهه مؤلم .. فقبل الحلق بالموس لازم الشعر يكون قصير جداً جداً .. هذه الآلة تسوي لك ذا الشيء تحلق لك المنطقة بدون ألم بدون جروح بدون أي شيء .. ممكن لو حبيتي تظلي بهذه الحلاقة وهي تقريباً تخلي الشعر طوله ١ ملم يعني شيء تحسيه باليد لما تمرري عليه يعني بتحسي بدبابيس كذا .. وإذا تحبي المنطقة تكون أكثر نعومة خصوصاً للمتزوجات يصير بعدها تمدي الجل أو الكريم أو الزيت الخاص بالحلاقة وبعدها تحلقي بالموس بس زي ماكتبت بموضوعي السابق يفضل يكون الموس بثلاث شفرات أو أكثر عشان تحلقي بشكل أسرع وأنعم وبدون جروح .

الحلاقة بالآلة أسويها حلاقة جافة وباتجاه نمو الشعر مو العكس عشان ماتنجرحي وتتألمي وتتحسسي.. بصراحة ما أعرف ولا قد جربت إذا هي أصلاً تستخدم مع جل أو أي مسهل للعملية بس ماظنتي إنها بتزبط .. اللي قد جربتها وزبطت معاها تكتبت بالتعليقات تحت .

ماقد استخدمتها على وجهي البته البته .. فقط على منطقة البكيني .. عشان مدري ما أحس أبغى استخدام آله لوجهي وللبكيني مدري ههههه .. أيضاً ماقد سويت ستايلنج أو شكل بالاستكيرات مدري أحس أوفر شوي ممكن في بنات يحبوا وحتى في أزواج يحبوا كذا فممكن تسووها بالآلة بشكل جداً سهل وبسيط وتسوي ع شكل برازيلين بيكيني Brazilian Bikini اللي تحبيه ويعجبك من أي شكل تبغيه ..

طيب في بنات سألوني ليش اشتريت ثلاث حبات خلال خمس سنين استخدام ..
أول مره جتني هدية مع ماكينة نزع الشعر .. جلست معاي حول سنتين وبعدها ماصارت تشتغل مدري ليش .. ثاني مره اشتريتها جلست معاي ٣ سنين ماخربت ولا شيء بس كنت أبدل البطارية فقط ..وقبل تقريباً فترة مو بعيدة استخدمتها وأنا تحت الشاور يعني في موية ومن فهاوتي مكتوب بالـ Warning التحذيرات ممنوع تجي عليها موية وبعدها قعدت كذا يومين وخربت ماعادت تشتغل .. المرة الثانية لما اشتريتها مفتكرة السعر كانت بـ ١٥٠ ريال .. هذه المرة لما اشتريتها أخذتها بـ ٨٩ ريال شوفوا كيف نزل سعرها .. أخذتها من عبدالواحد للأجهزة بس تلاقونها بكل الصيدليات وبساكو وبكل مكان يبيع أجهزة .. 

في نصيحة صغنونة ممكن تكون صحيحة بس تأكدوا منها من دكاترة الليزر وهي لبنات الليزر .. أول شيء أنا ماسويت ولا قد سويت ليزر لا لجسمي ولا للبكيني .. فماعرف لو معلومتي صحيحة بس أحس كذا إحساس ليش ؟ لأن أنا زي ماتعرفوا أعاني من البشرة الحساسة جداً واستخدامي للموس بجسمي صار - مستححححيل - ماتتخيلون صرت أمرض وأسخن لما أحلق جسمي بالموس صرت أتعب وأصير أستخدم مسكنات وكريمات سواء حلقت وجسمي حار يعني مافيني قشعريرة وإذا جتني قشعريرة من البرد هههه وقت الحلاقة بيكون أم أم الألم فعشان كذا ماصرت أستخدم الموس أبداً لجسمي ..نرجع لموضوع الليزر لما أنا أشيل بالموس للبكيني المنطقة تصير حساسة .. فما أتخيل بنات الليزر يسوون بذي الحالة شطات نار على ذي المنطقة ماشاء الله شيء مؤلم وأحس سبب شكوى الأغلبية بأن المنطقة تصير سمراء أكثر أو حتى ينصابوا بحروق يكون بسبب هذا الشيء يعني تشيلي بالموس بنفس اليوم وتكشطي طبقة الجلد وتجيبي نار عليها مدري أشوفه شيء غلط .. بهذه الحالة أشوف هذه الآلة شيء جداً ممتاز وقت الليزر .. ماتكشط ماتجرح وقت الحلاقة تترك لك طول الشعر تقريباً ١ ملم يعني ماتشيلي شيء من الجلد الميت .. أنا ما أعرف لو الليزر يحتاج الشعر يكون صفر تماماً عشان يزبط لو كان كذا أتوقع مستحيل أسويها نهائياً بعمري ..بس لو مايهم فأشوفها شيء ممتاز خصوصاً لهذه المنطقة تأكدوا لي من المعلومة للي يروحون يسوون ليزر واكتبوا لي تحت بالتعليقات ..

بس هذه هي كل المعلومات يارب ما أكون نسيت حاجة أو نقطة مهمة .. حاولت أكون ملمّة بشكل واضح وجمعت كل أسئلتكم بالسناب وجاوبت عليها هنا .. لو في حاجة ماقلتها أو حابين تضيفوا نقاط أنا ماذكرتها اكتبوا تحت ..





3 comments

  1. جججججميله التدوينه حمستني اجرب بس انا مااحب اشيل المنطقه الا بالحلاوه صح قد سمعت انه مو زين بس مااعرف مارتاح سبحان الله والليزر الكلام اللي قلتيه صح المشكله مو البكيمي الليزر عدمممممم وجهي حسبي الله بس مدري من العياده او ان وجهي مايتحمل والحمد لله شوي شوي بدا يرجع مثل قبل ففكرة الحرق والنار اتوقع كلامك صح بس مدري اذا اللي قد جرب بالبكيني عنده فكره ثانيه ❤️❤️من حبي فيك سبحان الله يشدني اي شي تقولينه او تصورينه الحب من الله ومحبينك كثار بسم الله عليك واتوقع تلاحضين اسمي بكل حته عندك انستقرام سناب الخ ��✌��️

    ReplyDelete
  2. اهلاً رنا ��
    حبيت التدوينة مره لأن الالة كانت عندي وبرضو هدية مع جهاز اكبر ولااستخدمتها حسيت انها ماتشيل كويس ورميتها :) تحسفت اني ماجربتها بطريقتك هذي ����
    قريبا بشتريها واجرب
    وشكرًا جزيلاً ��.

    متابعتك :
    Khulood1990

    ReplyDelete
  3. كنت متحمسه اجربها بس لمن عرفت انها تحلق ماتنتف هونت مافيه احسن من النتف ينعم المنطقه وينظفها
    سبق وتكلمتي عن الشرائح الشمعيه وقلتي انك تستخدمينها للحين تستخدمينها ولالا ؟؟
    وبالنسبه لليزر اعرف ٣ بنات لمن يسووا ليزر بكيني تجيهم التهابات بس احس موضوع الالتهابات سهل يتعالج بسرعه كله يهون في سبيل النظافه خصوصا شعر البكيني مسبب لي عقده

    ReplyDelete

♥رأيك يسعدني ♥ fell free and comment♥