رحلتي لجزيرة بالي .. كم كلفتني مِن وإلى ؟!! طيران ، فنادق ، أسواق ، مطاعم وكله !


السلام عليكم 

بهذه التدونية راح أتكلم عن رحلتي لـ جوهرة الأرخبيل الإندونيسي جزيرة بالي من ناحية :
الأسعار والفنادق والمواصلات والأكل والشعب وكله ..



جزيرة بالي تشتهر بعدة نقاط وهي اللي تحدد لك وتساعدك بالاختيار وتشوفين هل هي مناسبة لزيارتك ؟ هل هي مناسبة لميولك ؟ لرغباتك ؟

الجزيرة تحتوي على شواطيء خلاّبه بالمعنى الحرفي !!
حقول الأرز أو مزارع الأرز الأجمل على الإطلاق !!
جبال بركانية ومعالم فنية جميلة جداً !!
أجواء استوائية رائعة !!

خلوني أوصف لكم بالمختصر المفيد هذه الجزيرة اللطيفة :

جزيرة بالي تجمع مابين الرومنسية والنشاطات ومابين الجو المعتدل والخضرة الخلّابة .
جزيرة بسيطة جداً بتلاحظون الشوارع والمباني بدائيه وبسيطة جداً الشعب أغلبهم بسيط جداً 
وكعادة الشعب الإندونسي الابتسامه ماتروح من وجههم وخدومين بشكل مو طبيعي وطيبين مره يحسسونك بإنك ملكة
جوها أغلب السنة معتدل ماعندهم برد مره ولا حر مره ولكن في مواسم تكثر الأمطار بشدة .
الجزيرة للي يحب الرومنسية بيلاقي فيها رومنسية واللي يحب الأنشطة والمغامرات بيلاقي فيها اللي يتمناه
فيها شواطئ وفيها جبال فيها خضرة ومناظر طبيعية تجنن .

كثير منكم سألني رنا الجزيرة مناسبة لشهر عسل أو للعوائل ؟

فالحقيقة أنا زرتها مع أهلي كرحلة عائلية عام ٢٠١٤ كتبت عنها - هنا - و - هنا -
وزرتها مع زوجي كتجديد لشهر العسل الآن ٢٠١٧ ..
وأشوفها مناسبه للطرفين بشكل جبّار حسب وين الأماكن اللي تروحينها ..

وكثير منكم أيضاً سألني رنا شهر عسل في أوروبا ولا شهر عسل في بالي ؟

أول شيء مو أنا أحدد رغبتكم ولا راح أقولكم الأفضل هنا !! لأن أجواء الجزر الاستوائية تختلف عن الأجواء الأوروبية 
أنا قبل زواجي لما كنت أتناقش مع رامي عن وين نقضي شهر العسل كنت أقوله مستحيل أقضيه في مكان مايندرج تحت مسمى جزيرة بأي بقعة أرضية كانت سواء جزيرة بالي أو المالديف أو سانتوريني أو سيشيل أو أي مكان بس ربي ماكتب لنا نصيب والحمدلله جتنا الفرصة الآن وحققناها في جزيرة بالي لأننا شفناها مناسبة جداً لميزانيتنا الحالية ..
فكل وحدة حسب هي وزوجها وين يفضلون يقضون شهر العسل في أجواء استوائية أو في أجواء باردة أو في جزر ولا في مُدن على حسب كل شخص وميوله ..

....


زي ماتعرفون جزيرة بالي تابعة لإندونسيا الدولة المسلمة والديانة الرسمية للجزيرة هي الإسلام ولكن أول ماتزورونها راح تلاحظون وجود الأصنام والمعابد ولحوم الخنزير والسبب بأن أغلب سكان الجزيرة ينتمون للديانة الهندوسية ! 
بما إن الجزيرة قريبة جداً من أستراليا يعني تبعد حول ساعتين تقريباً منها فراح تلاحظون أيضاً كثرة وجود الأستراليين مو بس كسياحة حتى كأصحاب ممتلكات فنادق أو مطاعم أو محلات .. 
أيضاً راح تشوفون جنسيات مختلفة من جميع أنحاء العالم كونها أحد أفضل الوجهات السياحية للجزر في العالم .

طيب باذكر لكم الآن أسعار الحجوزات ولكن ماراح أقدر أقول بالتفصيل لأن ماتذكر تماماً :

الطيران حجزنا عن طريق الطيران العماني وكان هو الأرخص وحصلنا عرض حدود ٣٠٠٠ ريال
 أنا ورامي من الرياض إلى جاكرتا ذهاب وعودة ..
بعد كذا حجزنا من جاكرتا إلى بالي ذهاب وعودة حدود الألف ريال عن طريق طيران جارودا الإندونيسي ..
فصار المجموع التقريبي للتذاكر : ٤٠٠٠ ريال 
ولكن مع وجود توقفين بمسقط وجاكرتا يخلي مدة الرحلة توصل لعدد ٢٤ ساعة  ..
 بس ماكان عندي مشكلة ولا زوجي عنده مشكله بعدد التوقف ومدة الرحلة ..
في ناس تتعب كثير من التوقفات فممكن تضيف زيادة على السعر لرحلة مباشرة أتذكر حصلت طيران مباشر للجزيرة بس أنا ورامي أقل سعر لقيناه في حدود ١٠ الآلاف ريال .. فزي ماتشوفون فرق السعر كثير حدود ٦ الآلاف ريال ..

بعد كذا الفنادق وكيف حجزناها :

زي ماتعرفون أو زي ماشفتوا بسنابي ( للإضافة : AnaChioca ) 
أول ٥ ليالي حجزناها بفيلا تجنن بالتصميم صاحبها أسترالي في حدود ١٦٠٠ ريال ولكن كانت سيئة جداً من حيث الموقع ، قبالة شارع وقبالة مدرسة فكان ازعاج مو طبيعي كأن السيارات والدبابات تمشي بداخل الفيلا وكأن طلاب المدرسة كانو بداخل الفيلا من قوة الصوت في منطقة اسمها Kuta Utara ..
 خرجنا من الفيلا من أول يوم يعني بس ريحنا فيها ليلة حق بعد تعب السفر ورحنا لفندق اسمه :

ذا كوتا بيتش هيرتاج
الرابط - هنا -
إذا حجزتوا عن طريق الرابط هذا - هنا - راح يجيكم خصم حدود ٤٠ ريال

 وحجزنا ٤ ليالي اللي كان مفترض نقضيها بالفيلا السابقة وكان سعر الحجز في حدود ١٠٠٠ ريال بدون إفطار ..
ماكنا نتمنى نقضي أول الليالي بمنطقة مزدحمة زي منطقة كوتا كنا نفضل ومخلينها لآخر الليالي عشان التسوق راح أذكر لكم اياها بالتفصيل في النهاية بس من قوة التعب اللي كان فينا اخترنا أول خيار طلع لنا وقت الحجز هو هذا الفندق ..
الفندق حلو نظيف مرتب وهاديء عكس الفيلا اللي كنا فيها مقابل لشاطيء كوتا يفصل مابين الفندق والشاطيء مباشرة شارع صغنون .. حوالينك كل شيء حرفياً فنادق ومطاعم ومحلات وأسواق كل شيء تقضينه وتسوينه برجولك ماتحتاجين سيارة ..

بعد كذا رحنا للمنطقة اللي عجبتني كثير وهي منطقة أوبود منطقة مرتفعة شوي تبعد عن كوتا حوالي الساعة ، مليانة حقول أرز وهادية جداً وبتلاحظون بهذه المنطقة كثير هندوس ومعابد بس جداً رايقين .. أيضاً بتلاحظون كثرة المطاعم النباتية اللي ذحين راح أقولكم عليها أو بالأحرى ألذ مطعم نباتي أكلت فيه ..

حجزنا الفيلا في أوبود عن طريق موقع AirBnb
لو سجلتوا عن طريق الرابط هذا راح يجيكم خصم ٩٤ ريال 
الرابط - هنا -

اسم الفيلا أو وصفها  :

Affordable- Luxury Honeymoon private villa Ubud-B
الرابط - هنا -

حجرنا ٣ ليالي تقريباً ب٩٠٠ ريال مع إفطار مجاني يومياً يجيبونه لكم للفيلا 
كان مكتوب في بانيو بس طلع مافي وكمان سألناهم عن الغسالة قالو مافي بس هم يغسلون وغسيلهم يجنن يخلص لكم بنفس اليوم وتجيكم ريحة الملابس روعة ورخيييص غسلنا كل ملابسنا مع الكوي ب١٥ ريال بس !!
الفيلا جديدة مالها شهرين من افتتحت نظيفة جداً وكل شيء واضح إنه جديد الأثاث والديكورات والمسبح .. اطلالتها فضيييعة على حقول الأرز أو مزارع الأرز ..
عندهم سائق يوديكم لأي مكان في أوبود مجاناً ويعطونكم جوال وشريحة عشان تتصلون عليهم لما تكونون بأي مكان بالجزيرة مثلاً تقولون جهزوا لنا العشاء أو نظفوا الغرفة أو أي طلبات تبغونها ..
هدوء رائع ومكان مناسب للاستجمام والرومنسيه ..
تقدروا تطلبونهم يسوون لكم عشاء رومنسي على ضوء الشموع بالفيلا يحطون لكم ورد ع المسبح وشموع كثيرة بس راح تدفعوا زيادة 
حسب تقييمي أنا ورامي الفيلا هذه أفضل مكان سكنا فيه من وصلنا للجزيرة ،،


بعد كذا خرجنا لمنطقة كوتا اللي خليناها آخر شيء عشان التسوق والشاطئ
لفندق اسمه :

Kuta Seaview Cottage
لقينا عرض عليه بموقع ٥ ليالي غرفة شهر عسل بإفطار ومساج ترحيبي مجاناً بـ ١٦٠٠ ريال
الرابط - هنا -

هم كاتبين بالموقع هذا إنه نجمتين بس بالحقيقة هو فندق ٤ نجوم
الفندق ملاصق للفندق اللي سكنا فيه أول الأيام نفس الشارع ونفس كل شيء
منطقة حيوية جداً ماتنام الا الفجر ههههه 
كل شيء حوالينكم حرفياً مطاعم أسواق ومحلات ..
الفندق يعتبر من أقدم الفنادق بالجزيرة أظن عمره ١٠٠ سنه حاجة زي كذا
فبتلاحظون ديكورات الفندق على الطراز البالي القديم بس مع ذلك يعتبر نظيف وحلو ومتوفر فيه كل الإمكانيات اللازمة
حتى يوفرون لكم مظلات مجانية خلال مواسم الأمطار ..
إفطار الفندق كان لا بأس فيه يعني نفطر فيه الساعة ٨ ع الخفيف وبعدين نطلع لمقهى جلوريا جينز ونكمل فطور هناك ههههه

كذا خلصنا من الفنادق اللي زرتها وأسعارها وتقييمي لها ..

نجي للأنشطة اللي جربناها :

أول الأيام اخترنا نتمشى بمنطقة كوتا مشياً على الأقدام ونستكشف كل شيء ونروق على البحر ونجرب المساج
بعدين طلعنا لأبود أول ليلة اخترناها تكون في الفيلا ننبسط ونسبح ونتمشى بحقول الأرز
بعد كذا طلعنا لمزرعة القهوة والمساج و لمغامرة التجديف وكنا ناووين نطلع لحديقة سفاري عشان نركب الفيله 
بس الوقت ماسمح وكان ضيق ..
وطبعاً أول نشاط لنا في التجديف تزحلقت من شدة المطر وطحت على رجلي وانتفخت وصار عندي إلتواء بالكاحل زي ماشفتوها بالسناب وماصرت اقدر امشي عليها فبعدها قضينا نص اليوم الثاني في المستشفى وطلبت مني الدكتور الامتناع عن المشي وممارسة أي نشاط ..

فخربت خطتنا اللي كنا مجهزينها للأنشطة ولكن مع ذلك أبغى أنصحكم من هذه الناحية
مهم جداً تشيكون على أسعار النشاطات وتحجزونها أون لاين قبل توصلون لوجهتكم زي مثلاً
مغامرة التجديف كلفتنا ٧٥٠ ريال لمدة ٣ ساعات مع غداء مجاني 
السعر مره كثير ولما شيكنا أون لاين لقينا عرض للتجديف شخصين ب ١٤٠ ريال !!
خذوا العرض بدون غداء لأن مكان الغداء صراحة تقرفنا منه وما أكلنا فيه فا مومهم تاكلوا مع العرض اطلعوا مكان نظيف برا أفضل .. ولازم تجربوا النزول عن طريق الحبل مع التجديف ..

كل شيء يابنات سواء حدائق أو نشاطات زي مثلاً أنا ورامي كنا ناويين على البراشوت بس عشان رجلي فكنسلنا الفكرة كل هذه النشاطات شوفوا عروضها أون لاين تجيكم أرخص !! هم أصلاً بس يشوفونكم خليجيات يرفعون السعر لأضعاف الأضعاف !!
مثلاً زرنا منطقة نوسا سوا للأنشطة البحرية وقلنا ممكن نشوف حاجة مايكون فيها جهد بدني عشان رجلي فشفنا زيارة جزيرة السلاحف بس فقالوا لنا ب٨٠٠ ريال وجلسنا نكاسرهم بالسعر وكان وقت مطر شديد والناس متوقفه عن كل الأنشطة لين رضيو ب١٩٠ ريال شوفوا فرق السعر كيف هههههه !
المهم بعد كل ذا التعب والمكاسره ماعجبتنا الجزيرة حقت السلاحف مع إن قد زرتها مع أهلي كانت ممتعة بس يمكن عشان وقت المطر كل شيء كان ظاهر كئيب وممل ..
كنت أشوف رامي يقارن بأسعار النشاطات والتذاكر حقت الحدائق عن طريق موقع اكسبيديا شيكوا عليه قبل تروحون وحددوا منه النشاطات اللي ودكم تسوونها 
الرابط - هنا -
وكمان موقع ( قروب أون ) يعطيكم تخفيضات وحجوزات للأنشطة .

راح أجاوب الأن على أكثر الأسئلة المتكرره :

كيف الأسعار هناك ؟

الأسعار بتكون حسب ميزاينة الشخص وحسب اش هو يشوف ويبغى ، في فنادق ومنتجعات وفلل جداً جداً فخمة توصل الليلة ب٤٠٠٠ الآلاف ريال وفي اللي نظيف ومتوسط وحلو زي الفيلا اللي اخذناها فوق حدود ٣٠٠ ريال لليلة فالأسعار راح تحصلون الغالي والرخيص والمناسب لكل شخص وميزانيته ..

هل يوجد عرب في الجزيرة ؟

من أول ماوصلنا الجزيرة لين طلعنا صادفنا قليل عرب يعني يمكن ٥ أو ٤ مرات فقط شفنا أشخاص عربيين، ممكن يكونون كثير بس ماننتبهه إلا إذا سمعنا الكلام ههههه .

كيف هي الأجواء في الجزيرة ؟

الجزر بشكل عام في شرق آسيا دائماً أجوائها معتدله دافئة بما إنها على خط الاستواء 
ولكن في شهور تكثر فيها الأمطار وتقل الأسعار وفي شهور تكون جافة وترتفع الأسعار
من أبريل تقريباً إلى أغسطس على كلامهم يكون الجو جاف يتخلله بعض المرات بنزول أمطار 
شهر أكتوبر اللي زرت الجزيره فيه مع أهلي هو الشهر المثالي بالنسبة لي للزيارة هو الشهر اللي يكون يومين جاف ويوم مطر وبعدها ٣ أيام جاف ويوم مطر وزي كذا
الشهر اللي رحنا فيه هو نوفمبر وتقريباً كان كل يوم كلللل يوم مطر يستمر لساعات طويلة 
فمن نوفمبر إلى بداية أو منتصف مارش راح يكون أمطار وممكن يكون هذا الشيء جداً مزعج لبعض الناس بيحث مايقدروا يمارسوا أي نشاط لصعوبة الحركة وحتى الحيوانات تتخبى وتختفي وهذه الشهور تقل الأسعار فيها ..
كمان معلومة مهمة من ناحية الشهور الممطرة زي ماوريتكم بالسناب زوجي إنسان حساس جداً من الناموس
فيوم كنا جالسين بمقهى الشيراتون وانقرص من شيء مو عارفين هو نامس ولا ايش
وزي ماقضينا ليلة بالمستشفى عشان رجلي رحنا وقضينا ليله بالمستشفى عشان رامي هههههه
وبعد الفحوصات شرحت لنا الطبيبة بإن الآن نوفمبر موسم أمطار غزيرة فكل الحشرات ينزلها المطر من بيوتها للأرض فممكن رامي تعرض للدغة حشرة معينة أو ممكن يكون نامس .. بس لاتشيلوا هم الحمدلله الآن أنا واياه بخير ..

اش استخدمتوا مواصلات ؟

استخدمنا حاجتين أغلب الوقت أوبر للأماكن القريبة مع العلم بإن أوبر ممنوع في بعض المناطق ..
وسائق خاص يعرف كل الأماكن السياحية والبعيدة يوميته من ٨ الصباح لين ١٢ الليل بـ٨٠ ريال 
اسم السائق : أحمد يتكلم عربي رقمه : 6282147061638+
مديره اللي يدبر سواقين في حال لو مارد عليكم أحمد : 6281338669231+
وفي منطقة كوتا استخدمنا رجولنا أغلب الوقت يعني مشي حتى لو يبعد المكان مسافة ٢٠ دقيقة .


تعامل الشعب الإندونسي وتقبله للسياح ؟

جزيرة بالي إحدى أفضل الوجهات السياحية في العالم من ١٠٠ سنة أو أكثر 
تخيلوا كل ذي السنين ومايحسنون المعاملة ؟ مستحيل !!
شعب طيب لأبعد حد خدومين ومتقبلين لجميع الجنسيات ومتسامحين مع جميع الأديان 
بتشوفونهم زي النحل مجتهدين في الشغل والابتسامة على وجههم .

كم يوم تحتاج الجزيرة عشان تفرّون كل الأماكن فيها ؟

على حسب كل شخص وايش يبغى !
أنا ورامي قلنا أسبوعين ١٠ أيام نفرّ الجزيرة ونشاطات وحركات و٥ أيام نبغاها استجمام وجالسين مانتحرك
الجزيرة بشكل عام تحتاج ١٥ يوم تقريباً عشان تفرّون كل شيء .. أما لو فقط كاستجمام ونقطة نشاط تحتاج أسبوع بالكثير ..

هل الجزيرة مناسبة للعوائل ؟

مو فاهمه اش المقصد من أغلبية الناس لما تقول هل المكان مناسب للعوائل ؟ يعني بالضبط كيف مناسب للعوائل ؟ إذا انت ماتقدر ولازم تتحاشى المناظر اللي ماتناسبنا لاتسافر أفضل لأن مافي مكان بالعالم يخلو من ذا الشيء !! حتى لو الدولة مسلمة هي منفتحه على الأديان والثقافات الأخرى فبالتالي راح تشوف حاجات ماهي مناسبة لك ..
أول كنت أحسب الناس لما تسألني مناسبة للعوائل يعني هل فيها ملاهي وأنشطة للأطفال والمراهقين بعدين بنت شرحت لي النقطة وقالت لا يعني مافيها بنات بالمايوه على الشاطيء !! طيب ياعالم أكيد في بنات بالمايوه على البحر الواجب مننا كمسلمين نمارس حريتنا واعتقادنا في كل أنحاء العالم بغضّ البصر ! هل من المعقول نجبّرهم على اعتقادنا ؟ لا فبالتالي لو الشخص مايحس نفسه يقدر يغض البصر سواء كنت فرداً من العائلة أو مسافر مفرد روح للشواطئ الخاليه من البشر !! في شواطيء خاصة ومافيها أحد في أقصى شمال الجزيرة وكثير ناس تمدحها بس مشكلتها بعيده جداً قرابة ٤ ساعات تحتاج عشان تروح لها وفي أماكن قليلة زيارتها من البشر أيضاً قريبة شوي حول ساعتين ، تقدرون تتواصلون مع سائق خاص يكون معاكم ويوديكم ويرجعكم بس مو تروحون بأوبر عشان ماتكون المنطقة مقطوعة أو مافيها سائقين انتبهوا !

كيف الأكل عندهم ؟

الأكل في الجزيرة بشكل عام لذيذ جداً ومناسب ورخيص .. صحيح أغلب اللي في الجزيرة من الهندوس مع ذلك جزيرة بالي الديانة الرسمية لها هي الإسلام فبالتالي كل طرق الذبح للحيوانات يشترط أن تكون على الطريقة الإسلامية مع ذلك انتبهوا كثير كثير في مطاعم قليلة تقولك خلطنا مع الدجاج لحم خنزير أو طبخنا استيك اللحم مع لحم ودهن الخنزير فلذلك اسألوا احتياطاً كل مره هل الأكل حلال ! .. الأكل الاندونسي جداً لذيذ أحلى من الصيني في نظري لأنه خفيف الحلاوة يعني ماتحسونه حالي كثير !!
أنصح كثير تجربون أطباق الاسموذي بالفواكة يعني جرّبوا الأطباق مو الكاسات تاكلون الاسموذي بالملعقة..
 أحلى أطباق الاسموذي ذقناها في مقهى جلوريا جينز ..
جربوا مطاعم بيتزا هت في الجزيرة مستحيل تذوقون زي أكلهم في الخليج أبداً البيتزا والمكرونات جربوا كل اللي في المنيو حقهم يجنن ورخيص بشكل لايصدق !!
لاتنسوا تروحوا شاطئ جيمبران الرومنسي وتحجزوا طاولة عشاء رومنسي كله أسماك وأكلات بحرية لذيذة
لاتنسوا تجربوا مطعم هندي مشهور اسمه queens of india الفرع اللي في نوسا دوا مستحيل مستحيل تاكلون أكل هندي زيه بالعالم لذذذيذ بشكل خرافي أختي وزوجها يقولون إذا بنرجع للجزيرة بنرجع بس عشان هذا المطعم هههههه .
لاتنسوا تجربوا المطاعم النباتية للناس اللي زيي عندهم فضول يجربوا مطاعم نباتية، في مطعم في منطقة أوبود ألذ مطعم أكلت منه أنا وزوجي في الحياة اسمه - Sage - ضروري تجربونه وتشوفون كيف سووا نكهات الأكل لنكهات لحوم عن طريق الأطعمه النباتيه فقط .
والأهم الجزيرة جنة خضروات وفواكهه جربوا كل العصيرات المتوفرة والسلطات اللذيذة ..
الأسعار رخيصه جداً مثلاً نصرف يومياً بالأكل قرابة ٣٥٠ ريال من الفطور للعشاء مع سناكات بين وبين الوجبات ..

اش استخدمنا برنامج لتقييم المطاعم ؟

استخدمنا برنامجين حملوهم في الجوالات هم :
Foursquare
Google Map

اش أفضل المناطق بالجزيرة ؟

من خلال زيارتي المرتين اللي رحتها فيهم راح أقولكم برأيي أنا 

منطقة كوتا القريبة من المطاعم والأسواق وكله هي منطقة مزدحمة حيوية تحسون فيها حياة من جد
فيها ازعاج البارات آخر الليل وازعاج أصوات الناس والسيارات والدبابات ..
بتشوفون ناس كثير يمارسون التزلج على الأمواج لأن الموج قوي ومندفع بهذه المنطقة 
بتشوفون ناس تتشمس كثير والشاطيء مزدحم جداً 

منطقة نوسا دوا هاديه رومنسية لو يرجع فيني الزمن أحجز فيها أول خمس ليالي بدل ماحجزت في شمال كوتا
كلها ألعاب بحريه بتشوفون الناس تلعب بارشوت ودبابات البحر والنطيطات وكله ههههه
فيها مطاعم على البحر مباشرة منظرها في الليل جداً رومنسي مع الشموع واللمبات والموسيقى
وقت غروب الشمس بتشوفون أجمل الألوان اللي خلقها ربي سبحانه ..

منطقة أوبود منطقة جبلية نوعاً ما خضراء جداً تمتاز بوجود حقول الأرز على مد البصر 
هادئة ولطيفة ومعزولة ممتازة جداً للاستجمام وللناس اللي تحتاج تسمع صوت الطبيعة والغابات صوت العصافير والحيوانات الجميلة اللي تطلع في الصباح .. منطقة مريحة جداً للأعصاب للناس اللي مضغوطة نفسياً وتبغى تستجم بقوة لازم تزور هذه المنطقة وتحجز فيها كذا يوم ..

في جزيرة صغيرونة تشبهه جزر المالديف اسمها Gili Meno إن شاء الله ماكون لخبطت بينها وبين لموبوك تبعد بالقارب عن بالي ساعة ممكن تحجزوا لها ليلة استكشافيه كامله بدون ماتباتون فيها حلوة كزيارة تشبهه جزر المالديف مويتها زرقااااء فاتحة والرمال بيضاء شيء خرافي ويجنن وسمعت بإن هذه الجزيرة من صغرها مايستخدموا السيارات فيها بس حلوة للاستجمام والسباحة في أماكن خاصة .. في آخر ليلتين لنا في الجزيرة قالولنا عنها وانقهرنا مارحنا زرناها من أول الأيام ..

رنا كيف التسوق واش أحلى الأسواق اللي رحتيها ؟

بصراحة اللي جايه عشات تتسوق لاتتحمس أبداً الجزيرة صحيح فيها سوقين كبار بس مابتشوفين محلات ماهي موجودة عندنا أغلب المحلات عندنا زيها ، في محلات للصناعات المحلية بس تناسبهم أكثر مثلاً الملابس أغلبها للشواطيء فمايحتاج يعني نخصص لها وقت كبير عشان التسوق الواحد مايتعنى لها .. عندهم صناعات محلية مثل التحف والصوابين وهذه الأشياء الخرافية جداً رائعة زي ماشفتوا بالسناب حقي ( للإضافة : Anachioca ) وريتكم إني اشتريت زيوت عطرية تجنن ريحتها واشتريت صحون الاسموذي من جوز الهند مصنوعة واخذت شنطة وقبعة من مصنوعة من السعف أظن اسمه كذا ههههه وفي حاجات مره حلوة للتسوق من ناحية الصناعات المحلية البسيطة بس غير عن كذا مافي شيء يحمس ..
أفضل سوقين زرتهم هم ديسكفري مول و بيتش ووك الاثنين جنب بعض وتقدروا تزورهم مشياً على الأقدام يعني المسافة بينهم ٢٠ دقيقة تقريباً على شارع كوتا الشهير .. سوق بيتش ووك كان ملاصق للفندقين اللي حجزتهم فوق في منطقة كوتا أما ديسكفري مول كان يبعد مسافة ٢٠ دقيقة مو بعيد مره قريب وماتحسون بالوقت ويطل ع البحر بشكل يجنن .
للناس اللي تحب أجواء الجزر وودها كثير بالتسوق ممكن تسوون جدول زيارة زي ماسوته أختي رنيم وزوجها وتقول يجنن قسموا الأيام أسبوع في جزيرة بالي وبعدين أسبوع في كوالالمبور ماليزيا بس الميزانية تحتاج لها ترتيب عشان الرحلات بيزداد سعرها ..


من ناحية البركان للأيام الحالية وكيف يمكن زيارة الجزيرة وهل هي آمنه ؟

الجزيرة آمنة جداً لأن البركان يبعد عن المناطق السياحية حوالي ٤ ساعات لا بعد ابشركم الأسعار انخفضت بشكل مهول
يعني شفتوا الفيلا حجزناها ب٩٠٠ صارت الآن بنص السعر !! يعني ممكن تلاقونها الآن ٣ ليالي ب٤٥٠ ريال بس المشكلة تكمن في المطار والطيران يعني كل ما ثار البركان وطلع أدخنة راح يتقفل المطار وبالتالي تتعطل الرحلات ولكن حسب ماسمعت بالإمكان أخذ أو الحجز عن طريق الباخرة اللي توصلكم من جاكرتا إلى الجزيرة لحين هدوء البركان اللي ممكن يستمر حوالي سنة كاملة .. طبعاً هذا الشيء طبيعي في الجزيرة وراح تشوفوا كذا جبل لبركان خامل ماشتغل من سنين كثيرة هههه ..

*الموضوع قابل للتعديل والإضافة*


شكراً كثير لآنكم كنتم معاي خطوة بخطوة في هذه الرحلة الجميلة
اعتبرها من أحلى الرحلات اللي سويتها بحياتي حتى لما طحت ومرض زوجي وتعطلنا عن أغلب الأشياء مع ذلك كانت أيام ممتعة وجميلة الحمدلله .
في معلومات أساسية كثير ماذكرتها لأن عمنا قوقل مايقصر اكتبوا فيه كل سؤال بخاطركم وراح تلاقوا الإجابة :)

أحبكم 
دمتم سعيدين

5 comments

  1. الله يجزاك خير ويسعدك

    ReplyDelete
  2. الله يسعدك رنا تقرير روووووعه

    ReplyDelete
  3. حبيت التدوينه الله يسعدك واستمري بكتابة التدوينات لأني احب تدويناتك ممتعه ومفيده وجميله قبل فتره رجعت قريت تقريا كل تدويناتك ايام 2013 2014 مهما كتبت كلمات من اليوم الى بكره مابخلص انا من اشد معجبينك استمري ولاتوقفي لأن في ناس يحبونك.

    ReplyDelete
  4. يسعدك ياري تقرير وافي ماشاء الله
    كمان كملي تقاريرك حق اندونسيا الجزء الثالث والرابع

    ReplyDelete

♥رأيك يسعدني ♥ fell free and comment♥